Prezıdent jumyssyzdyq máselesin qozǵady

ASTANA. QazAqparat - Búgin Aqordada ótken kezdesýde QR Prezıdenti Nursultan Nazarbaev jumyssyzdyq máselesin qozǵady, dep xabarlaıdy QazAqparat tilshisi.

Prezıdenttiń aıtýynsha, búginde jumys isteý úshin barlyq jaǵdaı jasalǵan. Tabys tabýdyń joldary kóp. Tetigin taýyp, alyp ketse, aqsha jasaýǵa bolady.

«Mysaly, qyz balalarǵa ylǵı emes, biraq bir apta balasyn baqsa, jalaqy tóleıdi. Úıin jınap berseń de, jalaqy tóleıdi. Aýlasyna qarasań, jalaqy tóleıdi. «Ol meniń jumysym emes» dep júrgen durys emes. Meniń jumysym emes deseń, mamandyq al onda, qazir memleket barlyq jaǵdaıdy jasap otyr. Mektepti bitirgennen keıin mamandyǵyń bolmasa, tegin birinshi mamandyqty alýǵa bolady. Keledi, oqıdy, mamandyq alady, jumysqa turǵyzady. Odan artyq ne kerek? Biz qyzdarymyz ben uldarymyzdy eńbekke baýlymasaq, el jumys istemese, salyqty tólemese, memleket qarajatty qaıdan tabady?», - dedi N.Nazarbaev.

Aıta keteıik, Aqordada ótken kezdesýde N.Nazarbaev barsha analar men qyz-kelinshekterdi 8 Naýryz - Halyqaralyq áıelder kúnimen quttyqtady.

«Ananyń qudireti sheksiz. «Onyń aldynda búkil dúnıe bas ıedi» dep tegin aıtylmasa kerek. Erte zamanda jaýlasqan jurttyń ortasyna ana aq jaýlyǵyn tastaǵan kezde soǵys toqtap, bitimge keletin bolǵan. Dástúrimizdi barynsha saqtap kele jatqan biz áıel zatyn ásirese qadirleıtin xalyqpyz. Qazaq ulty qyz balany árýaqytta alaqanyna salyp, aıalap otyratyn. Bul saltymyz otbasy úshin buzylmas zańdylyqqa aınalyp keledi. «Ana» degen qasterli sózdi estigende tebirenbeıtin júrek, tolqymaıtyn kóńil bolmaıdy», - deıdi N.Nazarbaev.

Sondaı-aq, Memleket basshysy kópbalaly otbasylarǵa kómek berý máselesin qozǵady.