Prezıdent Joldaýynda oryndy máselelerdi kóterdi - qoǵam qaıratkeri
«Zamannyń sát saıyn ózgerýi kez kelgen qoǵamnyń aldyna tyń ári jańa mindetterdi alǵa tartary bar. Álemniń qazirgi damýynyń barysynda qubylmaly jáne jańa syn-qaterleri kóp jaǵdaıdyń bar ekendigin Prezıdentimiz oryndy aıtty. Qazirgi Aýǵanstandaǵy jaǵdaı aıaq astynan osylaı ózgerip ketedi dep kim oılaǵan? Endi mine, ol jaǵdaı álemdi alańdatyp otyr. Orta Azııa memleketteriniń geosaıası jaǵdaıyna da keri áserin tıgizýi múmkin. Joldaýda saq bolý máselesi tekten tekke aıtylmasa kerek. Bul oraıda Prezıdentimizdiń «Kelesi másele. Aýǵanstandaǵy ahýal jáne jahandyq shıelenistiń kúsheıýi bizge qorǵanys ónerkásibi keshenin jáne Áskerı doktrınamyzdy tolyǵymen qaıta qaraýǵa mindetteıdi. Qorǵanys qabiletimizdi nyǵaıtyp, qaýip-qaterlerge jedel ún qatý memlekettik mańyzy bar basymdyqqa aınalýǵa tıis. Biz syrtqy qaterge jáne oqıǵanyń qalaı órbýine de daıyn bolýymyz kerek»,-degeni barshamyzǵa oı salsa etti. Atam qazaq «jaý joq deme jar astynda» degendi bilmeı aıtpaǵan shyǵar», - deıdi J.Erǵalıev.
Onyń aıtýynsha, Joldaýda sońǵy kezderi qalyń eldi alańdatyp otyrǵan biraz máselelerdiń sóz bolýy, olardy sheshýdiń joldarynyń naqtyly aıtylýy eldi qýantyp tastady. Bolashaqqa degen senimdi nyǵaıta tústi.
«Jem-shóp daıyndaýǵa qajetti jer kólemin keńeıtý máselesi aıtyldy. Prezıdentimiz aýyl adamdaryn birazdan beri tolǵandyryp, tipti qınap júrgen jaıdy dóp basty. Endigi arada aýyl sharýashylyǵyn osy zamanǵy bilim men ǵylym jetistikterine saı órkendetý qajet. Bul talas týdyrmaıtyn másele. Sol úshin egis alqaptaryna qatysty ǵaryshtyq monıtorıng jáne qashyqtan zondtaý múmkindigin keńinen paıdalaný kerektigin Memleket basshysy durys kóterdi. Biz ǵarysh salasyn damytýdan ilgeri basyp kele jatqan elmiz. Sondyqtan da egistikterimizdi ǵaryshtan zertteý jumystaryn atqarýǵa tolyq múmkindigimiz bar», - dep qosty J.Erǵalıev.
Sonymen birge, ol keıingi kezderi Qazaqstannyń táýelsizdigine qaýip tóndiretindeı iritki salýshylyq ishimizden de, syrtymyzdan da kórinis bere bastaǵanyn, Prezıdent Joldaýynda sondaı jaılardy aldyn alýda Qazaqstannyń birtutas jáne bólinbeıtin memleket ekendigin basa aıtqanyna toqtaldy.
«Prezıdentimizdiń Joldaýy taqyrybynyń «halyq birligi» degen sózben bastalyp otyrǵandyǵy da tegin emes dep oılaımyn. Óıtkeni sońǵy kezderi qazaq elin ishimizden de, syrttan da ǵaıbattaý, bardy joqqa shyǵarý, bolmaǵandy boldy deý sııaqty jat pıǵyldy pikirler aıtylyp jatyr. Bul el ishine iritki salý. Kóbinese memlekettik tilge qatysty túrli kózqarastar tóńireginde san qıly pikirler bar. Prezıdentimiz osy máselede ataly sóz aıtty. «Qazaq tilin damytý memlekettik saıasttyń basym baǵytynyń biri bolyp qala beredi. Bul salada aıtarlyqtaı nátıje bar. Qazaq tili shyn máninde bilim men ǵylymnyń, mádenıet pen is júrgizýdiń tiline aınalýda. Jalpy, memlekettik tildi qoldaný aıasy keńeıip keledi. Bul - zańdy qubylys, ómirdiń basty úrdisi. Sondyqtan qazaq tiliniń órisi tym shektelip bara jatyr deýge negiz joq. Ata Zań boıynsha Qazaqstanda bir ǵana memlekettik til bar. Bul - qazaq tili», - dedi Memleket basshysy. Endi qazaq tili memlekettik til me, til emes pe dep eki oıly bolyp júrgenderge taıaqty qolǵa ustatqandaı bolyp turǵan joq pa? Endi sol bir ǵana memlekettik til- qazaqsha sóıleıik, jazaıyq, til bilmesek úıreneıik, til bilmeıtinderge kiná qoımaıyq, tildi meńgerýge qol ushyn bereıik! Eń áýeli qazaqtyń tiliniń baǵyn ár qazaqtyń balasy jandyrýǵa mindetti!», - dep túıindedi J.Erǵalıev.
Eske salsaq, 1 qyrkúıek kúni QR Prezıdenti Qasym-Jomart Toqaev «Halyq birligi jáne júıeli reformalar – el órkendeýiniń berik negizi» atty halyqqa Joldaýyn jarııalady. Joldaýdyń tolyq mátini myna jerde.