Prezıdent Joldaýynda kóterilgen mindetterge saı Qazaqstan ekonomıkasy jańa belesterdi baǵyndyrady - B.Jámishev

ASTANA. Qańtardyń 29-y. QazAqparat /Aıdar Ospanalıev/ - Memleket basshysynyń Joldaýyndaǵy kóterilgen qarjy salasyna qatysty máselelerdiń barlyǵy sóz joq oryndalady. Sonyń arqasynda Qazaqstan ekonomıkalyq damýda jańa bıikterge kóteriledi. Qarjy mınıstri Bolat Jámishev búgin Parlament palatalarynyń birlesken otyrysynan soń Memleket basshysynyń Joldaýyna qatysty osyndaı pikir bildirdi,

dep habarlaıdy QazAqparat.

«Prezıdenttiń Joldaýynda kórsetilgen elimizdiń ekonomıka, qarjy salasyna qatysty mindetterdiń qalaısha júzege asyrylý qajettigi birden túsinikti. Sondyqtan qazir bizge olar boıynsha atqarylýy tıis sharalardy búge-shigesine deıin jan-jaqty qarastyryp, daıyndalyp alǵan jón. Joldaýda ulttyq qordyń jańa tujyrymdamasyna qatysty jaqsy máseleler kóterildi. Olar boıynsha bizge qyrýar jumystar atqarý qajet bolady. Júıeli sharalar ásirese «Turǵyn úı qurylys jınaqtaý bankiniń» jańa mártebesine de qatysty qolǵa alynýy tıis. Atalmysh bank endi qurylys salasy boıynsha tapsyrys bere almaıdy jáne óziniń klıentteriniń atynan qurylys ıpotekasy naryǵyna shyǵa almaıdy», dedi mınıstr.

Sonymen qatar ol mınıstrlikke «Batys Eýropa-Batys Qytaı» jobasy boıynsha da birshama jumystar atqarý qajet bolyp turǵandyǵyn atap kórsetti. «Sebebi, joba bizdiń tranzıttik áleýetimizdi aıtarlyqtaı arttyrýǵa kómegin tıgizedi», dedi B.Jámishev.