Prezıdent Joldaýy: Ulytaý jurtshylyǵy Toqaevqa alǵys aıtyp, hat joldady
«Jańa Qazaqstan: Jańarý men jańǵyrý joly» atty bıylǵy Joldaýynda Prezıdent Qasym-Jomart Toqaev Jezqazǵan óńirin Qaraǵandy oblysynyń quramynan shyǵaryp, Ulytaý atty oblys qurýdy tapsyrǵan bolatyn.
«Kazakhmys Holding» JShS eńbekkerleri men Ulytaý-Jezqazǵan aımaǵy halqynyń atynan 11 myńnan astam adamnyń qoly qoıylyp joldanǵan hatta Memleket basshysyna osy sheshimi úshin alǵys aıtylǵan.
«Qurmetti Qasym-Jomart Kemeluly! Siz Memleket basshysy retinde Ulytaý-Jezqazǵan jerine eki márte jumys saparymen keldińiz. Sol eki saparyńyz da Ulytaý aımaǵy jurtyna sony serpilis ákeldi. «Ulytaý-2019» halyqaralyq forýmy men «Joshy han» tarıhı-mádenı kesheni – sonyń naqty dáleli. Ulytaý jerinde ótken halyqaralyq forýmda Siz: «Ulytaý topyraǵy – alyp tulǵalardyń rýhy toǵysqan jer», - dep ult uıasy atanǵan jerge, onyń tarıhı ornyna zor baǵa bergen bolatynsyz. Joldaýyńyzdaǵy «Ulytaý oblysy ashylyp, onyń ortalyǵy Jezqazǵan qalasy bolady» degen sózińiz Ulytaý topyraǵynda toǵysqan alyp tarıhı tulǵalar rýhyna jasaǵan perzenttik, azamattyq taǵzymyńyz boldy», - delingen hatta.
Hat ıeleriniń paıymynsha keıingi 25 jyl atalǵan óńirdiń óndirisine de, halqyna da ońaı tımegen.
«Shırek ǵasyrǵa jýyq ýaqyt ishinde óndiristi qala Jezqazǵannyń da, Ulytaý aýdanynyń da óńi ketip, ózegi tala bastap edi. Endi bul aımaq qaıta túleý kezeńin bastaıdy. Saryarqanyń osy pushpaǵyn jaılaǵan qalyń jurt, óndiris eńbekkerleri, ardagerler men jastar Sizge osy sheshimińiz úshin shyn júrekten raqmetin aıtyp, alǵysyn jetkizedi», - dep jazylǵan hat mánininde.