Prezıdent Joldaýy: Memleket shaǵyn jáne orta bızneske qandaı qoldaý kórsetti
Ulttyq ekonomıka mınıstrliginiń habarlaýynsha, bıyl shaǵyn jáne orta bıznesti jeńildikpen kredıtteý jumystary «Bıznestiń jol kartasy 2025», «Qarapaıym zattar ekonomıkasy», «Eńbek» jáne «Jumyspen qamtýdyń jol kartasy» baǵdarlamalary, sondaı-aq aınalym kapıtalyn tolyqtyrýǵa Ulttyq banktiń jeńildikpen kredıtteý baǵdarlamasy sheńberinde jalǵasýda.
Atap aıtqanda, kredıtter boıynsha jyldyq mólsherleme 6%-dy quraıdy, aınalym kapıtalyn tolyqtyrýdy qarjylandyrý men kredıtter somasy ulǵaıtyldy, mıkro jáne shaǵyn kásipkerlik sýbektilerine qoljetimdi mıkrokredıt berý iske qosyldy.
Vedomstvo usynǵan aqparatqa sáıkes, bıylǵy birinshi jartyjyldyqta 31 myńnan astam joba 1 trln teńgeden astam somaǵa jeńildikti qarjylandyrý alǵan. Ekonomıkanyń zardap shekken sektorlaryndaǵy kásipkerlerdi qoldaý úshin shaǵyn jáne orta kásipkerlik kredıtteri qaıta qarjylandyrylýda. Ekonomıkalyq qyzmet túrleriniń tizbesi keńeıtilip, sýbsıdııalaý merzimi 3 aıǵa uzartyldy. Osy sharalarǵa bıýdjetten 18,4 mıllıard teńge bólingen.
Bıylǵy shilde aıynda «Bıznestiń jol kartasy» jáne «Qarapaıym zattar ekonomıkasy» baǵdarlamalary sheńberinde jańa bıznes jobalaryn sýbsıdııalaý úshin bıýdjetten qosymsha 13,2 mıllıard teńge bólindi. Eki baǵdarlamany qarjylandyrýdyń jalpy kólemi 186,3 mıllıard teńge boldy. Sonymen birge, shilde aıynda «Jumyspen qamtýdyń jol kartasy» baǵdarlamasy aıasynda «Bastaý-Bıznes» jobasynyń túlekterine shaǵyn nesıe berý bastaldy. Oǵan 22,5 mıllıard teńge bólindi. Aýyldaǵy óz kásibin jańadan bastaıtyn kásipkerlerdiń 5 myńdaı jobasyn qarjylandyrý josparlanýda.
Sonymen birge, birinshi jartyjyldyq qorytyndysy boıynsha «Bıznestiń jol kartasy 2025» jáne «Qarapaıym zattar ekonomıkasy» baǵdarlamalary aıasynda jalpy somasy 441 mıllıard teńgege 12 447 joba sýbsıdııalandy. 187 mıllıard teńge bolatyn 10 788 jobaǵa kepildik berildi. Agrarlyq nesıe korporatsııasy sheńberinde 5,9 mıllıard teńge bolatyn 134 jobaǵa qoldaý kórsetildi.
Jyl basynan beri nesıelerdi sýbsıdııalaý quraly boıynsha eń kóp qoldaý kórsetilgen jobalar Nur-Sultan, Almaty qalalarynda jáne Jambyl oblysynda baıqaldy. Kepildik berý quraly boıynsha jobalardyń basym bóligi Jambyl, Túrkistan oblystarynda jáne Nur-Sultan qalasynda qoldaý tapty.
«Atameken» Ulttyq kásipkerler palatasy 50 myńnan astam kásipkerlik sýbektilerine saýalnama júrgizip, shaǵyn jáne orta bıznesti qoldaý boıynsha jańa sharalar paketin ázirledi. Atap aıtqanda, 2021 jylǵa arnalǵan ekonomıkalyq ósýdi qalpyna keltirý boıynsha ózekti keshendi jospar iske asyrylýda. Bul keshendi jospar 60-tan astam qoldaý sharalaryn iske asyrýdy, onyń ishinde bızneske júktemeni azaıtý, suranys naryqtaryna qoljetimdilikti qamtamasyz etý, jańa retteýshilik saıasatty engizýdi kózdeıdi.
Bıylǵy 1 qańtardan bastap, zardap shekken salalarda túsken tabystyń 3 paıyz mólsherlemesimen bólshek salyqtyń jańa arnaıy rejımi engizildi. Al 1 sáýirden 1 shildege deıin eńbekaqy tóleý qorynan zardap shekken salalarda salyqtardy tóleýdi keıinge qaldyrý usynyldy. 1 shildeden bastap jańadan qurylǵan óndiristik kompanııalar úshin 70 paıyz mólsherinde qosylǵan qun salyǵy boıynsha qosymsha esepke alý quqyǵy berildi. Usynylǵan qorǵaý quraldarynyń quny arqyly kásipkerlik sýbektileriniń qyzmetkerleri jeke tabys salyǵynan bosatyldy.
Sonymen birge, kelesi jyldan bastap bıznesti jańa negizgi qorlarǵa qaıta ınvestıtsııalaýǵa paıdalanylatyn korporatıvtik tabys salyǵynan bosatý jónindegi sharalar kózdelgen. Bızneske júktemeni túbegeıli tómendetý, ońtaıly jáne tıimdi rettegish júıeni qalyptastyrý maqsatynda kásipkerlik qyzmetti «taza paraqtan» retteý tásilderi jasalýda. Olar memleket pen kásipkerliktiń ózara is-qımylynyń bazalyq qaǵıdattaryn jetildirýdi kózdeıdi. Qazirgi ýaqytta tıisti Zań jobasy Parlamentte qaralýda.