Prezıdent Joldaýy: Qyzylorda oblysynda óńirlik damý baǵdarlamasy qabyldanady
Búgin oblys ákimdiginde Qazaqstan Respýblıkasynyń Prezıdenti Qasym-Jomart Kemeluly Toqaevtyń «Halyq birligi jáne júıeli reformalar - el órkendeýiniń berik negizi» atty Joldaýynan týyndaıtyn mindetterdi aıqyndaıtyn keńeıtilgen jıyn ótti.
Oblys ákimi Gúlshara Ábdiqalyqovanyń tóraǵalyǵymen ótken jıynǵa tıisti ákim orynbasarlary, basqarma basshylary, salalyq departament basshylary men selektorlyq rejımde Qyzylorda qalasy men aýdan ákimderi qatysty.
Aımaq basshysy óńir ekonomıkasynyń aldaǵy damý strategııasyna toqtaldy.
«Memleket basshysy pandemııadan keıingi kezeńdegi eldi odan ári damytýǵa, densaýlyq saqtaý júıesiniń tıimdiligin arttyrýǵa, sapaly bilimmen qamtýǵa, óńirlik saıasatty jetildirýge, adam quqyǵyn qorǵaýǵa baǵyttalǵan bastamalaryn jarııalady. Osylaısha, qazaqstandyqtardyń ál-aýqatyn arttyrýdaǵy 5 bastama aıqyndaldy. Joldaýda aıtylǵan barlyq baǵyttar boıynsha oblysta naqty sharalar qabyldanyp, iske asyrylady», - dedi G. Ábdiqalyqova.
Joldaýda aıtylǵan óńirlerdi damytý josparlaryn bekitilgen jalpyulttyq mindetterge sáıkes jańartý jáne bıýdjet úderisterin jeńildetip, bıýrokratııany barynsha azaıtý, sondaı-aq, bıýdjetti josparlaý men oryndaý kezinde tsıfrlyq tásilderdi qoldaný basty nazarda ustalady. Bul oraıda bıýdjettik baǵdarlamalar ákimshileriniń jaýapkershiligin arttyra otyryp, bólshektengen bıýdjetti engizý oılastyrylǵan. Atalǵan tapsyrmany júzege asyrý baǵytynda atqarylatyn is-sharalar jóninde oblystyq ekonomıka jáne bıýdjettik josparlaý basqarmasynyń basshysy Nurǵalı Qordabaı keńinen toqtaldy.
Oblystyq ındýstrıaldy-ınnovatsııalyq damý basqarmasynyń basshysy Rınat Sultangereev óńirdiń aldaǵy ınvestıtsııalyq múmkindikteri týraly aıtyp berdi. Atap aıtqanda, Joldaýda jer qoınaýyn paıdalaný salasyna, ásirese geologııalyq barlaý jáne jer qoınaýyn keshendi zertteý isine tyń serpin qajet ekeni, geologııalyq aqparattyń ashyq tsıfrlyq málimetter bazasyn quryp, ony ınvestorlar úshin qoljetimdi etý kerek ekeni kórsetilgen.
Jıyn barysynda oblys ákimi basqarma basshysyna geologııalyq barlaý jáne jer qoınaýyn keshendi zertteý boıynsha tıisti mınıstrlikpen jumysty qarqyndy túrde júrgizýdi tapsyrdy.
Prezıdent Joldaýynda azyq-túlik taýarlarynyń baǵasyn belgileý, ony bólip-taratýdyń tıimsiz júrgizilýi jóninde másele qozǵaldy. Osy rette oblystyń agrarlyq áleýeti jáne Joldaýdan týyndaıtyn mindetterdi oryndaýda naqty júıeli jumystar týraly oblystyq aýyl sharýashylyǵy basqarmasynyń basshysy Talǵat Dúısebaev naqty basymdyqtarǵa toqtaldy.
Jıyn barysynda oblys ákimi aýyl sharýashylyǵy salasyna qatysty birqatar tapsyrma júktedi.
«Azyq-túlik óndirisimen qamtamasyz etý balansyn esepteı otyryp, aýyl sharýashylyǵy salasynda ártaraptandyrý sharalaryn qabyldaý qajet. Mal sharýashylyǵy salasynda óndiriletin ónimderdiń basym bóligi jeke qosalqy sharýashylyqtardyń úlesinde, olardy qajetti jaıylymdyq jerlermen qamtylýy máselesin zańdastyrýdy uıymdastyryp, aýyldyq eldi mekenderde kooperatsııalaý jumysyn damytý aıasynda jeke qosalqy sharýashylyqtardy kooperatsııaǵa tartý boıynsha jumystaryn jandandyrý mindeti qoıylady. «Alqaptan sórege deıin» pılottyq jobasyn iske asyrýy boıynsha Jambyl oblysynyń tájirıbesin zerttep, óńirge engizý sharalaryn qabyldaýdy jáne sýarmaly sýmen qamtamasyz úshin, sý únemdeý tehnologııalaryn keńinen engizýdi tapsyramyn», - dedi Gúlshara Ábdiqalyqova.
Sondaı-aq, oblys ákimi kóterme-taratý ortalyǵyn qalyptastyratyn ınvestor taýyp kóterme-taratý ortalyǵyn ashýdy, qyrkúıek aıynyń sońyna deıin sýbsıdııalaý qaǵıdalaryn tolyqtaı qarastyryp, ózgerister engizý úshin júıeli problemalar boıynsha tıisti usynystardy ortalyq atqarýshy organdarǵa joldaýdy, áleýmettik mańyzy bar negizgi azyq-túlik taýrlarynyń baǵalaryn turaqtandyrý maqsatynda óńirlik turaqtandyrý qorynyń mamandandyrylǵan mekemesi arqyly ýaqytyly satyp alý ınterventsııalaryn júrgizýdi júktedi.
Qyzylorda oblysy kásipkerler palatasynyń dırektory Ǵalymbek Jaqsylyqov bıznes salasyn damytý boıynsha atqarylatyn jumystarǵa toqtalyp, ol mindetterdi júzege asyrý barysyn tilge tıek etti.
Joldaýda kóterilgen áıelderdiń qoǵamdaǵy ekonomıkalyq jáne saıası ustanymyn barynsha qoldaýdy qamtamasyz etý, «Halyq únine qulaq asatyn memleket» tujyrymdamasyn ózektendirý boıynsha jobalardy iske asyrýda azamattyq qoǵam ókilderiniń róli mańyzdy. Osy rette aldaǵy iske asatyn jobalar boıynsha «Azamattyq alıans» zańdy tulǵalar birlestigi» qaýymdastyǵynyń tóraıymy Anar Іzden sóz sóılep, birqatar usynystaryn ortaǵa saldy.