Prezıdent Joldaýy halyqtyń kókeıinde júrgen basty problemalardy ashyq kórsetti – sarapshy

NUR-SULTAN. QazAqparat – Prezıdent Joldaýy – aýqymdy baǵdarlamalyq mańyzy bar qujat. Onda memlekettik apparat pen jalpy qoǵam úshin uzaq merzimdi baǵyt-baǵdarlar, ózekti basymdyqtar naqty kórsetilgen. Bul pikirdi QR Prezıdentiniń janyndaǵy Qazaqstan strategııalyq zertteýler ınstıtýty áleýmettik-saıası zertteýler bóliminiń jetekshi ǵylymı qyzmetkeri Madına Bektenova aıtty, dep habarlaıdy QazAqparat.

«Memleket basshysy halyqtyń kókeıinde júrgen basty problemalardy ashyq kórsetti. Atap aıtsaq, elimizdiń ekonomıkasyn kóterýge jáne áleýmettik jaǵdaıdy turaqtandyrýǵa baǵyttalǵan qarajattyń durys jumsalmaýy, aýyl sharýashylyǵy sektoryndaǵy kókeıtesti ahýal, aımaqtardyń jaǵdaıyn qıyndata túsken sý men jem-shóp tapshylyǵy, bilim berý men ǵylym salasyndaǵy qıyndyqtar jáne basqa da júıeli sheshimderdi qajet etetin máseleler. Osylaısha Prezıdent qarapaıym zattar ekonomıkasy, tabıǵı jáne tehnogendik resýrstardyń tapshylyǵy jóninde esimizge salyp, olardy saqtaý men kóbeıtý boıynsha naqty mindetterdi kórsetip berdi», - deıdi sarapshy.

Onyń aıtýynsha, koronavırýs pandemııasynyń jalpyálemdik daǵdarysy halyq tabysyna teris yqpalyn tıgizýde, halyqty kredıtterdi shamadan tys alýǵa májbúrleýde. Bul máselege asa nazar bólinip, kelesi jyldan bastap elimizde eń tómengi jalaqy 42500 teńgeden 60 myń teńgege artatyny belgili boldy.

Sondaı-aq, 2022-2025 jyldary bıýdjetten qarjylandyrylatyn sala qyzmetkerleriniń jalaqysy jyl saıyn 20 paıyzǵa ósedi. Sala qyzmetkerleri sanatyna mýzeı qyzmetkerleri, muraǵatshylar, kitaphanashylar, tehnıkalyq qyzmetkerler, qoryqshylar, kólik júrgizýshileri jáne basqalary kiredi, demek muǵalimder, dárigerlermen qatar bul sanattaǵy azamattarymyzǵa da aılyqty kóbeıtý jumystary qolǵa alynbaq.

«Joldaýda kórsetilgen ǵylymdy damytýdyń basymdyqtary men tapsyrmalary ǵalymdar qaýymdastyǵy men ǵylymı zertteý ınstıtýttarynyń kópten kútken kúrdeli máseleleriniń ońtaıly sheshimi ekeni anyq. Jaqynda Ulttyq ýnıversıtetterdegi professorlardyń jalaqysy 450 myń teńgeden kem bolmasyn degen mınıstrlik talaby shyqqan. Endi Memleket basshysynyń tapsyrmasymen ǵalymdarǵa beriletin memlekettik granttar merzimi 3 jyldan 5 jylǵa deıin uzartylady. Ol bastama irgeli, sondaı-aq praktıkalyq mańyzy bar ǵylymı zertteýlerdiń sapasyn kóterýge, jáne ǵalymdardyń bir zertteý taqyrybyn uzaq merzimde, jan-jaqty, tereń zertteýge jol ashatyny sózsiz. Ǵylym salasynda zańnamany ózgertý jóninde pikir-talastardyń oryn alyp jatqany belgili, osy rette jyl sońyna deıin Ǵylym týraly zańǵa tıisti ózgertýler engizý jónindegi Prezıdent tapsyrmasy – ýaqytyly ári pármendi qadam», - deıdi M. Bektenova.

Halyqtyń ál-aýqatyna tikeleı áser etetin densaýlyq salasy da Prezıdent nazarynan tys qalǵan joq. Prezıdent vaktsınanyń kómegimen talaı qaýipti indetterge tosqaýyl qoıylǵanyn eske sala otyryp, elimizdiń vaktsına máselesine joǵary jaýapkershilikpen qarap, júıeli túrde vaktsına qorlaryn kóbeıtip turýǵa tapsyrma berdi.

Memleket basshysy eldegi vaktsınaǵa qarama-qaıshy kózqarastardyń bar ekenin moıyndap, otandyq vaktsınanyń qaýipsiz ekenin aıtyp, jalpy azamattardy vaktsınadan qoryqpaı, resmı aqparatqa súıenip, óz densaýlyǵy men jaqyndary úshin vaktsına alýdyń mańyzyn ashyp kórsetti. Osy oraıda, jaqynda QazVac otandyq vaktsınasy klınıkalyq synaqtan ótkizilip, 1-shi jáne 2-shi kezeń nátıjeleri «THE LANCET» eýropalyq jýrnalynda jarııalandy.

«Prezıdent Q.Toqaev el tuǵyryn bıiktetý men táýelsizdigimizdi nyǵaıtýda eń bastysy ulttyń uıysýy, ultaralyq kelisimniń jáne ózara syılastyqtyń bolýy mańyzdy ekenin osy Joldaýda taǵy da erekshe atap kórsetti. Memlekettik tildiń konstıtýtsııalyq deńgeıdegi mártebesin jáne ult birligi úshin mańyzdy rólin aıta kelip, Memleket basshysy ózge tilder men ult ókilderin syılaý arqyly eldegi beıbitshilik pen kelisimdi saqtaýǵa shaqyrdy», - deıdi M. Bektenova.