Prezıdent joldaýy - bıznesti damytýdyń jańa serpini

TÚRKІSTAN. QazAqparat - Túrkistan oblysynyń ákimi Ómirzaq Shókeevtiń tapsyrmasyna sáıkes QR Prezıdenti Qasym-Jomart Toqaevtyń «Syndarly qoǵamdyq dıalog - Qazaqstannyń turaqtylyǵy men gúldenýiniń negizi» atty joldaýyn túsindirý maqsatynda oblystyń aýdan jáne qalalarynda belsendi túrde turǵyndarmen kezdesýler ótkizildi, dep habarlaıdy qazAqpaart óńir basshysynyń baspasóz qyzmetine silteme jasap.

Túrkistan oblysy ákiminiń orynbasary Meıirjan Myrzalıev bastaǵan jumys toby Maqtaaral, Jetisaı jáne Shardara aýdandarynyń turǵyndarymen kezdesti.

Óz kezeginde Meıirjan Myrzalıev kásipkerlik salasy, ınvestıtsııa tartý, eksportty qoldaý jáne t.b. salalar aıasynda atqarylyp jatqan jumystarmen bólisti. Meıirjan Myrzalıevtiń aıtýynsha, Túrkistan oblysy boıynsha jalpy 138 myńnan astam shaǵyn jáne orta kásiporyndar jumys isteıdi. «Prezıdenttiń Joldaýynda krsetilgen mindetterge sáıkes, mıkro jáne shaǵyn bıznesti 3 jyldyq merzimge salyqtan bosatý tetikteri ázirlenedi. Sonymen qatar, oblysta «qarapaıym zattar ekonomıkasy» baǵdarlamasy belsendi túrde júzege asyrylýda jáne Túrkistan oblysy nátıjeler boıynsha kósh bastap tur», - dedi oblys ákiminiń orynbasary.

Sondaı-aq, jıynǵa qatysýshylar aýdandarda atqarylǵan jumystarǵa toqtalyp, Elbasy Joldaýyndaǵy mindetterdiń oryndalý barysyn talqylady.

Aıta ketý kerek, oblysta kásipkerlikti damytýdyń jańa arhıtektýrasy ázirlengen bolatyn. Nátıjesinde mamandar toby qurylyp, onyń quramyna Investıtsııalar jáne eksport basqarmasy, «Turkistan Invest» front ofısi, Kásipkerlerge qyzmet kórsetý ortalyǵy jáne «Agrarlyq nesıe korporatsııasy» AQ oblystyq fılıaly, «Ońtústik» AIO jáne «Yrys» MQU kirdi. Atalǵan uıymdar jumysyn oblys ákiminiń orynbasary Meıirjan Myrzalıev qadaǵalaýda.

Osy oraıda, turǵyndarmen ashyq dıalog ornatý maqsatynda búkil komanda joǵaryda atalǵan aýdandar kásipkerlerimen kezdesý ótkizdi, onda bıznestiń eń ózekti máseleleri kóterildi.

Sonymen qatar, jumys toby birqatar kásipkerlik nysandarynda boldy, olar osy kásiporyndardyń ári qaraı damýyna kedergi keltiretin máselelerdi anyqtap, olardy sheshý joldaryn talqylady.

Sapardyń sońǵy nysany Shardara aýdany, Alataý batyr aýylynda ornalasqan «International Company of Cotton» JShS maqta óńdeý zaýytynyń ınvestıtsııalyq jobasy boldy. Investıtsııalyq jobanyń somasy 5,5 mlrd teńgeni quraıdy. Maqta óńdeý zaýyty osy jyldyń qazan aıynda iske qosylady, dep kútilýde. Bir jyl ishinde zaýyt maqta talshyǵyna 144 000 tonna maqta óńdeıdi. 47 000 tonna maqta talshyǵy ónimderi Qytaıǵa, Sıngapýr Respýblıkasyna jáne Ózbekstanǵa eksporttalady. 200 jumys ornyn qurý josparlanýda.