Prezıdent Joldaýy aıasynda memlekettik organdardyń jumys kestesi 7-10 kún ishinde anyqtalady

ASTANA. QazAqparat - Memleket basshysy Nursultan Nazarbaevtyń búgin jarııalaǵan «Qazaqstan jańa jahandyq naqty ahýalda: ósim, reformalar, damý» atty Joldaýy aıasynda memlekettik organdardyń endigi jumys kestesi 7-10 kún ishinde belgili bolady. Bul týraly búgin Ortalyq kommýnıkatsııalar qyzmetiniń brıfıngisine qatysqan Májilis depýtaty Ramazan Sárpekov málim etti.

Jalpy, depýtattyń aıtýynsha, Elbasynyń búgingi Joldaýyndaǵy tapsyrmalar «Ult jospary. 100 naqty qadam» baǵdarlamasyndaǵy mindettermen astarlasyp jatyr. «Joldaýda Úkimetke, Parlamentke, tipti, árbir oblys pen qala ákimshiligine naqty tapsyrmalar berildi. Sondyqtan 2016 jyly Qazaqstannyń atqaratyn mindetteri osy Joldaýy aıasynda júredi», - deıdi depýtat. «Qazaqstan Respýblıkasy Konstıtýtsııasynyń 44 babyna sáıkes, Memleket basshysy jyl saıyn halqyna Joldaýyn arnaıdy. Bıylǵy Joldaýdyń taqyryby - «Qazaqstan jańa jahandyq naqty ahýalda: ósim, reformalar, damý» boldy. Qazaqstannyń ishki jáne syrtqy saıasatyna da qatysty tapsyrmalar aıtyldy. Sondyqtan aldaǵy 7-10 kún ishinde barlyq ortalyq memlekettik organdardyń jumys kestesi anyqtalyp, 2016 jyldan bastap Joldaýdy júzege asyrýǵa kirisemiz», - dedi depýtat R.Sárpekov.