Prezıdent Joldaýy árbir astanalyqqa túsinikti bolýy tıis - Baqyt Sultanov
Bul týraly Astana qalasynyń ákimi Baqyt Sultanov Astana ákimdiginde QR Prezıdenti Joldaýyn talqylaý boıynsha qala aktıviniń jınalysynda málimdedi.
«Elbasy Joldaýyndaǵy negizgi pikirler qazaqstandyq qoǵamdy jańǵyrtýdy jalǵastyrýǵa arnalǵan jańa múmkindikterdi kórsetti. Joldaý elimizdiń basty baılyǵy - adamnyń damýyna arnaldy jáne onda respýblıkanyń áleýmettik-ekonomıkalyq damýyndaǵy mańyzdy salalar qozǵaldy. Bıylǵy Joldaý mazmuny jaǵynan erekshe jáne ýaqyt eleginen ótken «Qazaqstan - 2050» strategııasy, «Nurly Jol» jańa ekonomıkalyq saıasaty, «5 ınstıtýtsıonaldy reformany júzege asyrý jónindegi ult jospary - 100 naqty qadam» qujattarynyń qısyndy jalǵasyna aınaldy», - dep atap ótti ákim.
Onyń aıtýynsha, Joldaý qoldanystaǵy memlekettik baǵdarlamalardy júzege asyratyn jańa qozǵaýshy kúshke aınalady.
«Prezıdent azamattardyń áleýmettik jaǵdaıyn, ómir sapasyn jáne qoǵamnyń damýyn jaqsartý boıynsha aýqymy jaǵynan teńdessiz sharalardy kórsetip berdi. Joldaýdyń árbir bólimin júzege asyrý álemniń aldyńǵy qatarly 30 memleketiniń qataryna nyq senimmen enýge múmkindik beredi. Memleket basshysy aıtqan mindetter 11 qyrkúıekte elorda aktıvimen ótken kezdesýde aıtqan maqsattarmen, atap aıtqanda, qalany damytýdyń jańa modelin engizý, ınnovatsııany nasıhattaý men kreatıvti adamdardyń artýyna jaǵdaı jasaýmen tyǵyz baılanysty. Joldaýdy júzege asyrýmen aınalysatyndardyń, ıaǵnı bizdiń endigi mindetimiz - Joldaýdy árbir astanalyqqa jáne elorda turǵyndaryna túsindirý, ondaǵy múmkindikter týraly habar berý», - dedi B. Sultanov.
Sonymen birge, ákim Joldaýda kórsetilgen barlyq sharalardyń oılastyrylǵanyn, olardy júzege asyrý úshin bıýdjetten ǵana emes, qosymsha jeke ınvestıtsııalar da tartylatynyn eske saldy.
«Sondyqtan, bizdiń aldymyzda turǵan negizgi mindet - Memleket basshysy kórsetken naqty sharalardy tıimdi júzege asyrý», - dep sózin túıindedi ákim.