Prezıdent Joldaýy-2021: Halyqtyń pikiri qandaı

NUR-SULTAN. QazAqparat – Búgin Memleket basshysy Qasym-Jomart Toqaev Qazaqstan halqyna Joldaýyn jarııalady. Joldaýda osyǵan deıin júzege asqan dúnıeler aıtylyp, alǵa jańa maqsat-mindetter qoıyldy. Osy oraıda QazAqparat tilshisi Prezıdenttiń jańa Joldaýyna qatysty astanalyqtardyń oı-pikirin tyńdap kórdi.

Zınaıda Ivanovna, zeınetker.

- Prezıdent aıtqan jáne qabyldaǵan sharalar shetinen júzege asyp jatyr. Sonymen birge alǵa qoıylǵan mindetter sońyna deıin iske asýy tıis. Solardyń qatarynda 1 myń mektep salý kerek degen tapsyrmasy kóńilden shyqty. Óıtkeni, bárimizdiń de balamyz bar. Ózime qatysty aıtar bolsam, zeınetaqyny kóterse, jaqsy bolar edi. Azyq-túlik baǵasyn shýlap júrip retke keltirgen sekildimiz, búginde turaqtaǵany baıqalady. Aıtpaqshy, umytyp baramyn, Toqaev aıtqan tapsyrmalardyń ishinde zeınetaqy jınaǵyn turǵyn úı alýǵa jumsaý - ońdy sheshim. Endi onyń shekti mólsherin ózgertse, bul qarapaıym halyq úshin mańyzdy.

Tolqyn Saǵynbaeva, elorda turǵyny.

- Iá, jalaqy ósedi degendi estidim. Qýantady. Ásirese, órt sóndirýshi sekildi jumysy aýyr mamandyq ıeleriniń eńbegi elense degen ótinish bar. Jalaqy ósýmen qatar baǵa turaqtalsa ıgi. Áıtpese jalaqy ósedi, izinshe azyq-túlik, basqa da zattardyń baǵasy kóterilip ketedi. Prezıdent aıtyp, naqty júzege asyp jatqan istiń biri - memlekettik qyzmetterdi tsıfrlandyrý. Onyń áseri baıqalyp jatyr. Búginde biraz qyzmetti úıde otyryp-aq alyp otyrmyz. Sondyqtan bar dúnıeni aıtqan durys. Burynǵydaı HQO-ǵa baryp júgire bermeıtinimiz ras. Óte yńǵaıly.

Asylzat Qanatqyzy, qala turǵyny.

- Halyqty jıi mazalaıtyn suraq - biz kóp tutynatyn zattardyń baǵasy. Bılik baǵanyń óspeýin qadaǵalaýy tıis. Ony Prezıdenttiń ózi de jıi aıtady. Basqa sala boıynsha meni el azamaty retinde mazalaıtyn suraq joq. Jumys bar, jalaqy ýaqytyly berilip tur. Ózim kópbalaly anamyn, balalarǵa beriletin járdemaqyny rásimdeý men alý joly jeńildeıdi degendi estip qaldym. Jaqsy bolar edi. Jańa Joldaýda biraz dúnıe aıtyldy ras, endi sonyń oryndalýyn kútemiz. Óz oıym, Memleket basshysy aıtqan dúnıeler sol qalpynda

oryndalýy tıis.

Merýert Aıtbaeva, elorda turǵyny.

- Memleket sońǵy ýaqytta áleýmettik máselelerge jıi kóńil aýdaryp jatyr. Onyń ishinde zeınetaqy, jalaqy men túrli járdemaqy da bar. Prezıdent kótergen taǵy bir mańyzdy másele - zeınetaqy jınaǵynyń bir bóligin baspana alýǵa jumsaı alý múmkindigi. Óte jaqsy bastama, onyń ústine úlken qalalarda turǵyn úı máselesi ótkir. Osy oraıda úıdiń baǵasy óspese eken degen tilek bar. Óıtkeni zeınetaqy jınaǵy árkimde árqalaı, báriniki birdeı páter alýǵa jete bermeıdi. Qarapaıym halyqty tolǵandyratyn basty másele - azyq-túlik baǵasy. Iá, bıliktiń baǵany ósirmeý jolynda jumys istep jatqanyn bilemiz, degenmen keı jaǵdaıda másele Prezıdent aralasqannan soń ǵana sheshilip jatady.

Jandos Elbazarov, qala turǵyny.

- Búgin Prezıdenttiń Joldaýyn teledıdar arqyly tyńdadym. Sodan uqqanym, eń tómengi jalaqy 60 myń teńgege deıin kóteriletini. Bul ásirese az qamtylǵan jáne áleýmettik osal otbasylar úshin edáýir qoldaý. Sol sııaqty Memleket basshysy 2024 jyly aýdan ákimderiniń saılaýy ótetinin aıtty. Bul da bir jańashyldyq, bıyl aýyl ákimderin saıladyq. Odan bólek, 800 mekteptiń ornyna 1 myń mektep salý kerektigi aıtyldy. Qoǵam úshin taǵy bir mańyzdy másele – til. Halyq tutastyǵyn oılasaq, meniń, seniń tiliń dep tarazyǵa salmaǵanymyz abzal. Óz basym Prezıdent Joldaýyn jyl saıyn jibermeı qaraımyn.