Prezıdent Joldaýynan pragmatıkalyq ıdeologııany kóre alamyz — Nurbek Pusyrmanov
«Prezıdent Qazaqstan halqyna Joldaýynda Úkimet atqarýy tıisti máselelerdi toǵyz tarmaqqa tizbektep, ár bóliminde Parlamenttiń róline, jumysyna toqtaldy. Sonymen birge Joldaýda ekonomıkalyq baǵdarǵa kóńil bólindi. Eger biz kontent taldaýmen qaraıtyn bolsaq, ınflıatsııa sózi kezdespeıdi jáne daǵdarys sózi de joq. Demek biz Joldaýdyń astarynan pragmatıkalyq ıdeologııany kóre alamyz, ıaǵnı Qazaqstan turaqty damyp kele jatyr. Onyń ári qaraı damýynda azamattyq qoǵam, memlekettik ınstıtýttar, odan keıin bıznes ókilderi birikken jaǵdaıda jumys qarqynyn tıimdi ete alamyz degenge shaqyrady», — dedi Nurbek Pusyrmanov joldaýdy talqylaý barysynda.
Odan ári ınstıtýt basshysy aýyl, aýdan ákimderin halyqtyń ózi saılaýyna qatysty oıyn aıtty.
«Mmleket basshysy bıyl aýyl, aýdan ákimderin saılaýdy pılottyq rejımde aıaqtap, keler jyldan bastap tolyqtaı kóshý qajettigin meńzedi. Bul Prezıdenttiń Joldaýda aıtqan bes jylǵy esebin qorytyndylaı otyryp, endi uzaqmerzimdi perspektıva 2029 jylǵa deıin josparlanǵan. Bul jerde Prezıdent memlekettik basqarý júıesin múmkindiginshe tómennen joǵary qaraı iske asyrýdy kózdep otyr, ıaǵnı jergilikti jerdegi qordalanǵan máselelerdi halyqtyń óz deńgeıinde sheshý. Halyqtyń jergilikti bıýdjetti qadaǵalaý, baqylaý fýnktsııasyn ornatý máselesi jańa Joldaýda keńinen aıtyldy», — deıdi ol.
Aıta keteıik, búgin Astanada QR Prezıdenti isi basqarmasy Prezıdent ortalyǵynda Memleket basshysynyń 2024 jylǵy 2 qyrkúıektegi «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty joldaýyn talqylaýǵa arnalǵan dóńgelek ústel ótti.
Іs-sharaǵa Májilis depýtattary, qazaqstandyq jáne sheteldik sarapshylar, ǵylymı qoǵamdastyq, damý ınstıtýttary men azamattyq qoǵam ókilderi jáne stýdentter qatysty.