Prezıdent Joldaýyn iske asyrý: Qazaqstanda Gıdrogeologııa qyzmeti qaıta quryldy
«Elimiz úshin sýdyń mańyzy munaı, gaz nemese metaldan kem emes. Sý sharýashylyǵy júıesin tıimdi damytý máselesimen derbes mekeme aınalysýy qajet dep sanaımyn. Sondyqtan Sý resýrstary jáne ırrıgatsııa mınıstrligi qurylady. Mınıstrliktiń aıasynda Ulttyq gıdrogeologııa qyzmeti qaıta jumys isteıtin bolady», - dedi Memleket basshysy Qasym-Jomart Toqaev Qazaqstan halqyna Joldaýynda.
Qazirgi ýaqytta atalǵan Qyzmetti qaıta qurý máselesimen aınalysatyn eki basqarmasy bar Departament quryldy. QR Úkimetiniń qaraýyna usynylatyn uıymdastyrý qurylymy men jarǵylyq qujattar ázirlendi.
Sý resýrstary jáne ırrıgatsııa mınıstrliginiń usynysyna sáıkes, Ulttyq gıdrogeologııa qyzmeti jer asty sýlaryn basqarý, izdeý-barlaý jumystary jáne olardyń memlekettik monıtorıngi salasynda memlekettik saıasatty júrgizý úshin uıymdastyrýshylyq jáne basqa da qajetti ókilettikterge ıe bolady. Jerasty sýlaryn utymdy paıdalaný máseleleri erekshe baqylaýǵa alynady.
Sý resýrstary jáne ırrıgatsııa mınıstri Nurjan Nurjigitov boljam boıynsha Qazaqstandaǵy jer asty sýlarynyń qory shamamen 40 tekshe kılometrdi quraıtynyn, onyń 15 tekshe kılometri qazirgi tańda paıdalanýǵa daıyn ekenin atap ótti. Búginde el ekonomıkasynda bul resýrstardyń 7-10%-y ǵana qoldanylady. Mınıstrliktiń josparynda – aýyzsýmen qamtamasyz etý, aýyl sharýashylyǵy jerlerin sýarý jáne jaıylymdyq mal sharýashylyǵyn qoldaý úshin jer asty sýlaryn belsendi túrde paıdalaný, bul rette qorlardyń sarqylýyna jáne lastanýyna jol bermeý úshin qatań baqylaý qamtamasyz etiledi.
Prezıdenttiń bastamasy Qazaqstannyń ornyqty damýy úshin sý resýrstaryn basqarýdyń strategııalyq mańyzyn kórsetedi, bul elimizdiń ishki qajettilikterine jáne jahandyq ekologııalyq syn-tegeýrinderge sáıkes keledi.