Prezıdent Joǵarǵy Sot tóraǵasy Aslambek Merǵalıevti qabyldady

<p>ASTANA. KAZINFORM - Memleket basshysy Joǵarǵy Sot tóraǵasy Aslambek Merǵalıevti qabyldady, dep habarlaıdy Aqordanyń baspasóz qyzmeti.</p>

Prezıdentke sot tóreliginiń sapasyn jaqsartý úshin qabyldanyp jatqan sharalar jóninde baıandaldy.

Aslambek Merǵalıevtiń aıtýynsha, analıtıkalyq blok aıtarlyqtaı kúsheıtilip, Joǵarǵy Sottyń jalpy normatıvtik qaýlylarynyń úshinshi bóligine túzetýler engizildi. Budan bólek, tergeý kezinde azamattardyń quqyqtaryn qorǵaý deńgeıi jaqsara tústi. Qamaýǵa alý túrindegi bultartpaý sharasyna sanktsııa berýden bas tartatyn jaǵdaılardyń jáne alqabılerdiń qatysýymen sotta qaralatyn isterdiń sany men bitimgershilik kelisimmen aıaqtalǵan azamattyq daýlardyń úlesi artty.

Memleket basshysyna sot reformasynyń barysy týraly málimet berildi. Mysaly, depýtattyq korpýspen birlese otyryp, Prezıdenttiń tapsyrmalaryn júzege asyrýǵa baǵyttalǵan zańnamalyq túzetýler jóninde bastama kóterildi. Atap aıtqanda, zańdy óreskel buzǵany úshin tártiptik is qozǵaý ınstıtýtyn qaıta qaraý, sot tóreliginiń sapasyn tekseretin komıssııa jumysyn jetildirý, derbes kassatsııalyq saty qurý usynylady.

Qasym-Jomart Toqaev zań ústemdigin qamtamasyz etý, sondaı-aq azamattar men kásipkerlerdiń quqyqtaryn jáne zańdy múddelerin qorǵaý isinde sot júıesi erekshe ról atqaratynyn atap ótti.

Memleket basshysy sot júıesin odan ári reformalaý jumystaryn jalǵastyrý mańyzdy dep sanaıdy.