Prezıdent jylý júıesi týraly: Memorgandar olqylyqtardan sabaq almaıdy
«Kommýnaldyq-energetıkalyq sektordy jańǵyrtý jumystaryn jedeldetý kerek. Eldi mekenderdiń tynys-tirshiligine qajetti barlyq júıe úzdiksiz jumys isteýin qamtamasyz etý mańyzdy. Bul – Úkimet pen ákimdikterdiń negizgi mindetiniń biri. Alaıda, jyl saıyn jylytý maýsymynda sol bir problemalar qaıtalana beredi. Memlekettik organdar qatelikter men olqylyqtardan sabaq almaıdy. Sonyń kesirinen osy sala qazirgi múshkil halge jetip otyr. Almatydaǵy ekinshi jylý elektr ortalyǵyndaǵy bý-gaz qondyrǵysynyń qurylysy sozylyp ketti», - dedi Qasym-Jomart Toqaev.
Memleket basshysynyń sózinshe, Ekibastuzdaǵy birinshi GRES-tiń energoblogyn qalpyna keltire almaı júrgenimizge on jyldan asqan.
«Sondaı-aq Ekibastuzdaǵy ekinshi GRES-ti keńeıtý jáne kúrdeli jóndeý jobasy ýaqtyly júzege asyrylmaı jatyr. Úkimet, eń aldymen, bıyl apatty jaǵdaıdaǵy 19 jylý ortalyǵyn jańǵyrtý jumystaryn aıaqtaýǵa tıis. Sonymen qatar qýaty 700 megavattan asatyn qosymsha qýat kózimen qamtamasyz etý kerek. Belgilengen merzimdi shegerýge bolmaıdy. Jalpy, elimiz elektr, jylý, sý óndirý jáne jetkizý qýatynyń tapshylyǵyn sezinip otyrǵany jasyryn emes. Balqash jylý elektr ortalyǵy qurylysynyń aıaqtalmaı qalýy, tabıǵı monopolııa sýbektileriniń ashyq jumys istemeýi, sondaı-aq tarıfterdiń ósimin qoldan tejeý – osynyń bári kezinde jiberilgen qatelikterdiń saldary. Salaǵa túbegeıli reforma júrgizgen jón. Ol úshin júıeli jumys atqarý qajet», - dedi Prezıdent.
Aıta keteıik, Úkimet úıinde qaıta jasaqtalǵan Úkimettiń keńeıtilgen otyrysy ótip jatyr.