Prezıdent Jetisý oblysynyń týrıstik áleýetimen tanysty

<p>Memleket basshysyna Shoqan Ýálıhanov atyndaǵy &laquo;Altynemel&raquo; memorıaldyq mýzeıinde Jetisý oblysynyń týrızm salasyn damytý úshin atqarylyp jatqan jumystar jóninde qysqasha málimet berildi, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Oblys ákiminiń orynbasary Rýstam Álıdiń aıtýynsha, týrızm salasynyń damýyna qatysty negizgi kórsetkishterde ósim baıqalady. Sońǵy úsh jylda óńirge kelgen týrıster sany eki ese artqan. Al osy saladaǵy kórsetiletin qyzmetter kólemi 16 mıllıard teńgege deıin ósti.

Atalǵan baǵyttyń damýyna tyń serpin berý úshin birqatar ınfraqurylymdyq joba júzege asyrylyp jatyr.

Atap aıtqanda, qazir Alakólge kóliktiń birneshe túrimen jetýge bolady. Byltyr Úsharal áýejaıynyń ushý-qoný jolaǵyna rekonstrýktsııa jasalyp, turaqty áýe qatynasy jolǵa qoıyldy. Bıyl «Astana – Dostyq» baǵyty boıynsha «Talgo» poıyzy iske qosyldy jáne «Úsharal – Dostyq» avtojolynyń rekonstrýktsııasy aıaqtaldy. Qazirgi kezde «Taldyqorǵan – Qalbataý – Óskemen» avtojolyn qaıta jóndeý, Alakól kýrorttyq aımaǵynda joǵary voltty elektr jelilerin tartý jumystary júrgizilip jatyr.

Buǵan qosa «Balqash» týrıstik-rekreatsııalyq aımaǵynyń bas jospary» ázirlendi. Onyń aıasynda uzyndyǵy 16 shaqyrym bolatyn jaǵalaýǵa bıýdjet esebinen ınjenerlik-kommýnıkatsııalyq jeli tartylyp, jalpy aýmaǵy 860 gektar jerge 7 baǵyttaǵy demalys aımaqtary ornalastyrylady. Jospar sheńberinde 30 mıllıard teńgege deıin jeke ınvestıtsııa tartý kózdelgen. Sonymen qatar kelesi jyly kólge aparatyn «Almaty – Óskemen – Lepsi – Aqtoǵaı» jolynyń rekonstrýktsııasyn aıaqtaý josparlanyp otyr.

«Altyn-Emel», «Jońǵar Alataýy» ulttyq tabıǵı parkterinde ekologııalyq týrızmge basymdyq beriledi. Bıyl «Altynemel» vızıt-ortalyǵy ashyldy. Al «Jońǵar Alataýy» ulttyq parkiniń aýmaǵynda jalpy quny 1,7 mıllıard teńge bolatyn 8 ınvestıtsııalyq joba júzege asyrylmaq.

Sonymen qatar Tekeli mańaıynda shańǵy-bıatlon keshenin salý jáne Burqanbulaq sarqyramasyna deıingi joldy jóndeý jumystary josparlanǵan.

 

Memleket basshysy týrıstik-demalys aımaqtaryna ınjenerlik-kommýnıkatsııalyq jeli júrgizýmen jáne abattandyrýmen belsendi túrde aınalysyp, oblystyń týrıstik áleýetin arttyrý qajet ekenin aıtty.

– Jalpy, oblysta týrıstik nysandar jetkilikti. Sondyqtan onyń bárine tıisti deńgeıde mán berip, damytý kerek. Týrızm Jetisý oblysy ekonomıkasynyń basym baǵyty bolýǵa tıis. Týrıster neǵurlym kóbirek kelse, oblysqa da oń septigin tıgizedi. Jetisý óńiriniń tabıǵaty keremet. Oblystyń týrızm salasyndaǵy áleýeti óte zor, – dedi Prezıdent.