Prezıdent jergilikti qamtý úlesindegi kózboıaýshylyqty synady
«Kúrdeli jáne ornyqty ekonomıkaǵa ónimdi ortasha jáne joǵary deńgeıde óńdeý segmentterin belsendi ıgeretin óńdeý ónerkásibi negiz bolatyny belgili. Sonymen qatar bul baǵytta kedergilerdiń kóptigi kásiporyndar «ǵumyrynyń» uzaqqa sozylmaýynan baıqalady.
Elimizdegi kompanııalardyń tórtten biri ǵana ashylǵannan keıin ekinshi jyly naryqta qalady. Salystyrar bolsaq, bul kórsetkish basqa elderde 70-80 paıyzǵa teń. Kóp jaǵdaıda bul Qazaqstandaǵy bıznes-ahýaldyń áli de jetilmegenin kórsetedi. Biraq munyń basqa da aspektileri bar. Máselen, qazirgi jaǵdaıda kóptegen el ishki naryqty qorǵaý jáne qoldaý sharalaryn belsendi qoldanyp jatyr. Osy ozyq tájirıbeni batyl ári keńinen meńgerýimiz kerek. Men muny Úkimetke aıtyp otyrmyn.
Ekinshi jaǵynan, Qazaqstanda óndiristiń jergilikti úlesin arttyrý úshin qolaıly jaǵdaı jasalǵan. Salyqtyq preferentsııalar men jeńildetilgen nesıelendirý beriledi, sondaı-aq ónimdi ótkizý boıynsha kómek kórsetiledi. Alaıda taýar óndirisiniń jergilikti úlesi ázirge tómendeý.
Shyn máninde, biz ımportty sýbsıdııalaý isin jalǵastyryp jatyrmyz. Bul óndiristiń bastapqy qalyptasý satysyndaǵy tabıǵı qubylys ekenin túsinemin. Sondyqtan atalǵan máselege «ósim derti» retinde qaraımyz. Eshteńe bolmaǵannan góri, osyndaı óndiristiń bolǵany durys. Alaıda Úkimet óndiristiń jergilikti qamtý úlesin arttyrý máselesimen muqııat jáne jan-jaqty aınalysýǵa tıis», - dedi Qasym-Jomart Toqaev.
Bul oraıda, ol keıbir kompanııalardyń jergilikti qamtý úlesine eńbekaqy tóleý qoryn, kommýnaldyq qyzmetterge jáne jarnamaǵa jumsalǵan shyǵyndardy qosatyn jaǵdaıǵa jetkenin synǵa aldy.
«Mundaı kózboıaýshylyqtyń bizge qajeti joq. Bul jerde «Atameken» palatasynyń róli anaǵurlym belsendi ári paıdaly bolýǵa tıis», - dedi sodan soń.
Memleket basshysy bul rette iri óndiris oryndaryn otandyq jabdyqtardy, toraptardy jáne bólshekterdi paıdalana otyryp, ónim shyǵarýǵa yntalandyratyn kooperatsııa qaǵıdatyn belsendi qoldaný qajettigin jetkizdi.
«Mashına jasaý salasyndaǵy memlekettik qoldaý sharalary iri bólshekterden emes, usaq bólshekterden ónim qurastyratyn aralas óndiristerdi ashýǵa kezeń-kezeńimen beıimdelýi qajet.
Jalpy, memlekettik tapsyrystardy alatyn jáne memleket qoldaýyna ıe bolatyn barlyq iri kásiporyndar, negizinen, qazaqstandyq taýarlar men qyzmetterdi satyp alýǵa tıis.
Elde osy ónimniń balamasy bolmaǵan jaǵdaıda ǵana ımportqa ruqsat etiledi. ıAǵnı ımportty tutynýshy kompanııaǵa nemese olardyń sheteldik seriktesterine 2-3 jyl ishinde osyndaı óndiristi Qazaqstanda iske qosýy nemese iske qosýǵa kómektesý jóninde mindetti shart qoıylýy qajet. Árıne, bul ekonomıkalyq turǵyda negizdelgen jobalarǵa ǵana qatysty», - dedi Toqaev.