Prezıdent: Jedel járdem qyzmetin kólikpen qamtýdy 3 jylda sheshý kerek
«Densaýlyq saqtaý salasynda ınfraqurylymdy damytyp, medıtsınalyq qyzmetterdiń sapasyn arttyrý jumystary jalǵasyp keledi. Ómir sapasy men bala týý kórsetkishi joǵarylady. 16 mıllıon elektrondy pasport jasaldy. Jedel járdem qyzmetiniń jumysy jańǵyrdy. Dári-dármek baǵasyn retteıtin zańǵa qol qoıyldy. Men osy jumystar úshin Densaýlyq saqtaý mınıstrin maqtaımyn», - dedi Nursultan Nazarbaev.
Dese de, Memleket basshysy halyqty áli kúnge deıin kórsetiletin medıtsınalyq qyzmetterdiń sapasy, ásirese óńirlerdegi qyzmet sapasy alańdatatynyn atap ótti.
«Jeke aýyldarda medıtsınalyq tekseristiń kóshpeli pýnkterin qurýǵa bolady. 3 jyl ishinde jedel járdem qyzmetin avtokóliktermen qamtý máselesin sheshý kerek. Bul - keıingi ysyrýǵa kelmeıtin sharýa. Adamnyń densaýlyǵyna qatysty jumys. Osy úshin Úkimet 27 mlrd teńge bólip, bul máseleni birjola sheshýi kerek. Biz adamdardy emdeý úshin poıyzdardy jiberýshi edik qoı. Sony nege toqtatyp qoıdyq? Bul sharýa úshin avıatsııany da aıqyndaǵan edik. 2020 jyldyń sońyna deıin ákimder eń birinshi kezekte aýdandyq aýrýhanalar men emhanalardy qajetti medıtsınalyq qurylǵylarmen qamtý máselesin sheshýi kerek», - dedi Prezıdent.
Nursultan Nazarbaev bul jumysty Shyǵys Qazaqstanda Danıal Ahmetov atqaryp qoıǵanyn basqalarǵa úlgi etti.
«Al basqalar nege osy jumysty atqara almaıdy? Osyny alǵa jyljytý kerek», - dedi Nursultan Nazarbaev.
Eske sala ketsek, Úkimet úıinde QR Prezıdenti Nursultan Nazarbaevtyń tóraǵalyǵymen Úkimettiń keńeıtilgen quramdaǵy otyrysy ótip jatyr. Elbasynyń qatysýymen Úkimettiń mundaı otyrysy jyl basynda turaqty túrde ótkiziledi. Búgingi jıynǵa Úkimet músheleri, Astana, Almaty jáne Shymkent qalalary men oblystardyń ákimderi, ortalyq memlekettik organdar men mınıstrlikter basshylary qatysýda.