Prezıdent: Jaýapty qala turǵyny – óz shaharynyń taǵdyryna beıjaı qaramaıtyn adam

ASTANA. QazAqparat – Astana Hub halyqaralyq IT-startaptar tehnoparki tek elimizdiń ǵana emes, búkil aımaqtyń tsıfrlyq transformatsııasyna eleýli úles qosady. Bul týraly Astananyń baýyrlas qalalary forýmynda Prezıdent Qasym-Jomart Toqaev aıtty, dep habarlaıdy QazAqparat tilshisi.

«Intelligent Community Forum bedeldi halyqaralyq uıymynyń málimeti boıynsha elorda álemdegi eń ıntellektýaldy qoǵamdastyqtyń biri retinde ozyq 21 shahardyń qataryna endi. Sonymen qatar qalamyzda Ortalyq Azııadaǵy eń iri Astana Hub halyqaralyq IT-startaptar tehnoparki quryldy. Bul tehnopark tek elimizdiń ǵana emes, búkil aımaqtyń tsıfrlyq transformatsııasyna eleýli úles qosady», - dedi Qasym-Jomart Toqaev.

Osy oraıda Prezıdent ekologııa salasyna árdaıym aıryqsha kóńil bólip otyrǵanyn aıtty.

«Atalǵan máselede azamattardyń ekologııalyq mádenıetiniń qalyptasýy sheshýshi mánge ıe. Іri qalalardaǵy kóshelerdiń qoqystan taza bolýy turǵyndardyń azamattyq sana-sezimi joǵary ekenin anyq kórsetedi. Jaýapty qala turǵyny degenimiz – bul, eń aldymen, óz qalasynyń jáne eliniń taǵdyryna beıjaı qaramaıtyn adam», - dedi Memleket basshysy.