Prezıdent jastarǵa Álıhan Bókeıhannyń qanatty sózin este ustaýǵa keńes berdi

NUR-SULTAN. QazAqparat - Prezıdenttiń kadr rezervine engender el jastaryna ultjandylyqtyń, otanshyldyqtyń ozyq úlgisin kórsetýi kerek. Bul týraly Aqordada Prezıdenttiń kadr rezervine kirgen jastarmen kezdesýde Memleket basshysy Qasym-Jomart Toqaev aıtty, dep habarlaıdy QazAqparat tilshisi.  

«Bizdiń maqsatymyz sizderdi laýazymdy qyzmetke taǵaıyndaý dep oılamańyzdar. Bul - eldi órkendetýge bel býǵan, sol úshin bar kúsh-jigerin jumsaıtyn azamattarǵa arnalǵan joba. Basty mindet - talantty jastardyń Qazaqstandy jańa belesterge kóterýine múmkindik berý. Eń bastysy - týǵan elińdi sheksiz qadirleý, oǵan adal qyzmet etý. Tabandy eńbek etip, naqty nátıjege qol jetkizý kerek. Bul ultty jańǵyrtý úshin óte mańyzdy», - dedi Qazaqstan Prezıdenti.

Memleket basshysy búgingi kezdesýge qatysýshylar arqyly elimizde patrıottardyń jańa býyny qalyptasatynyna senetinin basa aıtty. 

«Sizder egemen el jastaryna ultjandylyqtyń, otanshyldyqtyń ozyq úlgisin kórsetýlerińiz kerek. Kezinde Alash ardaqtysy Álıhan Bókeıhan «Ultqa qyzmet etý bilimnen emes, minezden» degen. Bul - eshqashan ózektiligin joǵaltpaıtyn, ýaqyt ótken saıyn mán-mańyzy arta túsetin qanatty sóz», - dedi Qasym-Jomart Toqaev.