Prezıdent «jasyl» energııaǵa kóshý jáne sý resýrstaryn saqtaý máselelerine de toqtaldy

<p>ASTANA. KAZINFORM &ndash; Qasym-Jomart Toqaev klımat ózgerýiniń saldarymen kúresý, ekologııany jaqsartý, sý-energetıka salasynyń tıimdiligin arttyrý máselesinde Germanııa uzaq jyldar boıy Ortalyq Azııa elderiniń senimdi seriktesi bolyp kele jatqanyn aıtty. Bul týraly Aqordanyń baspasóz qyzmeti málim etti.&nbsp;</p>

– Qazaqstan qazir Halyqaralyq Araldy qorǵaý qoryna tóraǵalyq etip otyr. Osy rette Aral teńizi basseıni elderine kómek kórsetý jónindegi is-qımyl baǵdarlamasy men Ortalyq Azııanyń ornyqty damýy úshin qorshaǵan ortany qorǵaýdyń óńirlik baǵdarlamasyn júzege asyrý aıasynda seriktestikti jandandyrýdy usynady. Bizdiń pikirimizshe, Qordyń qyzmeti óńirdegi ornyqty damý men órkendeýdi qamtamasyz etedi. Ornyqty eginshiliktiń aımaqtyq ortalyǵyn qurý jónindegi bastama óte ózekti. Bul bastamany búgingi kezdesýge qatysýshylardyń bári qoldaıdy dep oılaımyn, – dedi Qasym-Jomart Toqaev.

Memleket basshysy ǵylym-bilim salasyndaǵy baılanystyń damýyn mańyzdy mindet retinde atap ótti. Qazaqstan Prezıdenti Germanııanyń ǵylym-bilim qaýymdastyǵyn jasandy ıntellekt, tsıfrlandyrý jáne «jasyl» tehnologııa sııaqty perspektıvti baǵyttarda yntymaqtastyqty nyǵaıtýǵa shaqyrdy.

Sonymen qatar halyqaralyq qaýipsizdik pen turaqtylyqty nyǵaıtýǵa basa mán berildi. Qasym-Jomart Toqaev kúrdeli geosaıası jaǵdaıda qaýipsizdik pen turaqtylyqty qamtamasyz etý máseleleri kópjaqty yntymaqtastyqtyń bir bóligi retinde udaıy nazarda bolatynyn atap ótti.

– Elderimiz sanqyrly formatta, onyń ishinde Birikken Ulttar Uıymy aıasynda tyǵyz qarym-qatynas jasaıdy. Biz aldaǵy ýaqytta da álemde balamasy joq osynaý ámbebap Uıymnyń terrorızmmen, esktremızmmen, zańsyz kóshi-qonmen jáne klımattyń ózgerýimen kúrestegi, sondaı-aq bitimgershilik pen qarýsyzdandyrý isindegi kúsh-jigerin tolyqtaı qoldaýǵa nıettimiz. Qazaqstan Birikken Ulttar Uıymyn reformalaý úderisine de belsene atsalysýǵa daıyn. Birqatar damyǵan memleket, sonyń ishinde Germanııa BUU Qaýipsizdik Keńesiniń turaqty músheleriniń qatarynda bolýǵa ábden laıyq. Oraıly sátti paıdalana otyryp, 2027-2028 jyldary BUU Qaýipsizdik Keńesiniń turaqty emes músheligine kandıdatýrasyn usynǵan Qyrǵyz Respýblıkasyna tabys tileımin. Qyrǵyzstan Ortalyq Azııada jáne odan tysqary jerlerde turaqtylyq pen qaýipsizdikti nyǵaıtýǵa aıtarlyqtaı úles qosa alatynyna senimdimin, – dedi Qazaqstan Prezıdenti.

Sóz sońynda Memleket basshysy jıynda aıtylǵan barlyq usynys búgin qabyldanatyn Birlesken deklaratsııadan kórinis tabatynyna senim bildirdi. 

Kezdesý qorytyndysy boıynsha Ortalyq Azııa memleketteri basshylary men Germanııa Federaldyq kantsleriniń birlesken málimdemesi qabyldandy. 

Sammıtte GFR Federaldyq kantsleri Olaf Sholts, Qyrǵyzstan Prezıdenti Sadyr Japarov, Tájikstan Prezıdenti Emomalı Rahmon, Túrikmenstan Prezıdenti Serdar Berdimuhamedov pen Ózbekstan Prezıdenti Shavkat Mırzıeev sóz sóıledi.