Prezıdent jasandy ıntellekt salasyndaǵy sarapshy Lı Kaı-Fýdy qabyldady

<p>ASTANA. KAZINFORM &ndash; Prezıdent álemge belgili kásipker jáne jasandy ıntellekt salasyndaǵy sarapshy Lı Kaı-Fýdy qabyldady, dep habarlaıdy Aqordanyń baspasóz qyzmeti.</p>

Memleket basshysy Sinovation Venture jasandy ıntellekt ınstıtýtynyń prezıdenti, doktor Lı Kaı-Fýmen kezdesýde ozyq tehnologııalardy engizýdiń strategııalyq mańyzyn atap ótti. Sondaı-aq álemdegi jetekshi sarapshylarmen tájirıbe almasý tsıfrlyq transformatsııadaǵy órshil maqsattarǵa qol jetkizýge yqpal etetinin aıtty.

Qasym-Jomart Toqaev pen Lı Kaı-Fý jasandy ıntellektti bilim, densaýlyq saqtaý, energetıka jáne qoǵamdaǵy basqa da túrli salalarda paıdalaný boıynsha pikir almasty.

Qytaı men AQSh elderinde jasandy ıntellekt salasyn damytýda jáne baǵdarlamalyq ónimder ázirleýde baı tájirıbesi bar Lı Kaı-Fý Qazaqstannyń IT bastamalardy engizý, básekege qabiletti tehnologııalyq ekojúıe qurý isindegi áleýetin joǵary baǵalady.

Osyǵan deıin elimizde bıýdjetti josparlaýda jasandy ıntellekt qoldanylatyny týraly jazdyq.