Prezıdent jas kásipkerlerge bólinetin grant qarajatyn eki esege arttyrýdy tapsyrdy
Prezıdent «Atameken» ulttyq kásipkerler palatasynyń tájirıbesi týraly aıtyp, «Jas kásipker» baǵdarlamasyn ázirleýdi tapsyrdy.
«Shaǵyn nesıe berýdiń jáne oqytý isiniń oń tájirıbesi negizinde barlyq óńirde «Jas kásipker» baǵdarlamasyn ázirleý qajet. Joba aıasynda jyl saıyn bilim alatyn jumyssyz jastar men ózin ózi jumyspen qamtyǵandar sanyn 100 myńǵa deıin jetkizgen jón. Ol qoldan keletin nárse. Mysaly, sońǵy jylda «Atameken» kásipkerler palatasy «Bastaý» jobasyn qolǵa aldy. Ol boıynsha aýyldar men shaǵyn qalalarda 43 myń turǵyndy oqytyp shyqty», - dedi Nursultan Nazarbaev óz sózinde.
Elbasy Qazaqstanda 7 myń shaǵyn aýyl bar ekenin, onda mektepti bitirip, oqýǵa túse almaǵan balalardyń bar ekenin eske saldy.
«Olar qaı bıznespen shuǵyldaný kerektigin qaıdan biledi? Atameken ókilderi ár aýyldyń ereksheligine qaraı, jastarǵa keńes berip, nesıe alýdyń, joba jasaýdyń joldaryn úıretip júr. Atameken osy jumysty jalǵastyrýy kerek. Sonyń nátıjesinde 11 myńnan astam bıznes-jobalar qolǵa alynyp, 16 myńǵa jýyq jumys orny ashyldy», - dedi ol.
Sondaı-aq, Elbasy jas kásipkerlerge bólinetin grant qarajatyn eki esege arttyrýdy tapsyrdy.
«Úkimetke «Bıznes-2020» jol kartasy aıasynda jas kásipkerler úshin grant boıynsha bólinetin qarajat kólemin eki esege arttyrýdy tapsyramyn.
Osy arqyly úsh jylda shamamen 300 myńǵa jýyq jastar bıznestiń qyr-syryn meńgerip shyǵady. Olardyń tórtten biri nemese kem degende 80 myń adam óz kásibin bastap ketedi», - dedi N. Nazarbaev.
Prezıdent ýnıversıtettiń joǵarǵy kýrstarynda oqıtyn stýdentterdi de bızneske baýlýdy usyndy.
«Bitirýshi kýrstarda, ýnıversıtettiń joǵary kýrsynda oqıtyn 60 myńǵa jýyq stýdentti bızneske baýlý qajet. Kóptegen stýdentter 4-5 kýrsta bıznespen aınalysa bastaıdy. Túrli kompanııalar úzdik stýdentterdi shaqyra bastaıdy. Úkimetke bul baǵdarlamany júzege asyrý úshin úsh jyldyń ishinde 32 mlrd teńge bólýdi tapsyramyn», - dedi Memleket basshysy.
Aıta keteıik, Astanada «Táýelsizdiktiń urpaqtary» ataýymen Jastar jylynyń ashylý saltanaty ótip jatyr.
Sharaǵa Úkimet músheleri, QR Parlamenti depýtattary, jergilikti atqarýshy organ basshylary, QR Prezıdenti janyndaǵy Jastar saıasaty keńesiniń músheleri, «100 jańa esim» baıqaýynyń jeńimpazdary, «Bolashaq» baǵdarlamasynyń túlekteri, jas ǵalymdar qatysýda. Sonymen qatar bul jıynǵa shyǵarmashylyq, stýdenttik jáne jumysshy jastar ókilderi, jas sportshylar, daryndy balalar, zamanaýı medıa salasynyń ókilderi, balalar úıiniń tárbıelenýshileri men túlekteri, jas áskerı qyzmetshiler keldi.
Eske sala ketsek, QR Prezıdenti Nursultan Nazarbaev Qazaqstan halqyna bıylǵy Joldaýynda 2019 jyldy Jastar jyly dep jarııalaýdy usynǵan bolatyn.
Prezıdent óz sózinde jastardyń barlyq sanatyn qoldaýǵa arnalǵan sharalardy tolyq qamtıtyn áleýmettik satynyń aýqymdy platformasyn qalyptastyrý kerektigin aıtqan edi. Al, arada bir aıdan astam ýaqyt ótkende Elbasy Jarlyǵymen 2019 jyl Jastar jyly dep jarııalandy.