Prezıdent jas dinı kóshbasshylardy «tolyq adam» bolýǵa shaqyrdy
Forýmnyń ashylýynda sóz sóılegen Senat tóraǵasy, Álemdik jáne dástúrli dinder kóshbasshylary sezi hatshylyǵynyń basshysy Máýlen Áshimbaev Memleket basshysy Qasym-Jomart Toqaevtyń forým delegattaryna joldaǵan quttyqtaý hatyn oqyp berdi.
«Barshańyzdy birinshi jas dinı lıderler forýmynyń ashylýymen quttyqtaımyn. Men osydan eki jyl buryn Álemdik jáne dástúrli dinder kóshbasshylarynyń VII sezinde onyń jumysyn jandandyratyn jańa tásilder oılastyrýdy usynǵan edim. Forým delegattary bul usynysty biraýyzdan qoldady. Qazir osy baǵytta birqatar ıgi bastama tabysty júzege asyrylyp jatyr. Sonyń biri - jas dinı lıderler forýmy. Álemdik jáne dástúrli dinder kóshbasshylarynyń sezi órkenıetter úndestigin ornyqtyryp, beıbitshilik pen kelisimdi dáripteıtin biregeı dıalog alańy sanalady», - delingen quttyqtaý hatta.
Prezıdent dinder arasyndaǵy dıalogqa jas býyn ókilderin jumyldyrý ýaqyt talaby ekenin aıtady.
«Sebebi óskeleń urpaq qashan da jasampazdyq pen jańashyldyqtyń jarshysy. Túrli elde turatyn jastardyń din salasyndaǵy yntymaqtastyǵy adamzattyń rýhanı bolashaǵyn aıqyndaýǵa tikeleı áser etedi. Qazir álemde geosaıası qaıshylyqtardyń saldarynan túrli syn-qaterler paıda boldy. Osy almaǵaıyp kezeńde halyqaralyq qaýipsizdiktiń jańa júıesin qalyptastyrý óte mańyzdy. Bul rette din kóshbasshylary aıryqsha ról atqarady. Al oǵan jastardyń belsene qatysýy jumysqa tyń serpin bereri sózsiz. Qazaqtyń uly oıshyly Abaı «tolyq adam» týraly aıtyp ketken bolatyn. Bul tujyrym aǵylshyn tilindegi «a person of integrity», ıaǵnı, parasat-paıymy men bilimi tolysqan, boıyna rýhanı qundylyqtardy sińirgen adal azamat degen uǵymmen úndes. Sondyqtan jastardy tolyq adam bolýǵa umtylyp, álemniń damýyna úles qosýǵa shaqyramyn. Forým jumysyna sáttilik tileımin. Іzgilik jolyndaǵy isterińiz tabysty bolsyn», - dep jazylǵan Prezıdenttiń quttyqtaýynda.