Prezıdent jas blogerdiń tańǵalarlyq posty týraly aıtyp berdi

ASTANA. QazAqparat - Elbasy Nursultan Nazarbaev «Qazaqstannyń 100 jańa esimi» jobasynyń jeńimpazdarymen kezdesý barysynda jas blogerdiń elimizdiń jetistigi týraly jazǵan hatyn oqyǵanyn aıtty, dep habarlaıdy «QazAqparat» HAA tilshisi.

«Bir jas blogerdiń jazǵan hatyn oqydym. Osy jyldar ishinde aıtqym keletin tórt nárse bar depti: Birinshisi - Táýelsizdiktiń jarııalanýy jáne buǵan deıin bolmaǵan el shekarasynyń bekitilýi. Ekinshisi - naryqtyq reformalar men jekeshelendirýdiń jyldam ótkizilýi. Osynyń arqasynda myńdaǵan kásipker jumysyn bastady. Úshinshisi - kópultty qoǵamda kelisim men turaqtylyq qamtamasyz etildi. Tórtinshisi - búkil álemde Qazaqstannyń jaýy joq, bárine dospyz. Men jetistikterdi onnan bastap jıyrmaǵa deıin tizip aıta berer edim. Biraq osynaý jas blogerdiń qalaısha tórt artyqshylyqty tap basyp aıtyp bergenine tańǵaldym», - dedi Prezıdent.

Eske salaıyq, osy ýaqytta Astanada Elbasy Nursultan Nazarbaev «Qazaqstannyń 100 jańa esimi» jobasynda jeńiske jetken 102 tulǵamen kezdesý ótkizýde . Saltanatty shara Qazaqstan Respýblıkasynyń Tuńǵysh Prezıdenti kúni merekesimen tuspa-tus kelip otyr. Memleket basshysynyń jalpyhalyqtyq daýys berý arqyly anyqtalǵan jeńimpazdarmen kezdesýi elordadaǵy eń kórikti meıramhanalardyń birinde ótýde. Qazaqstannyń týyn bıikke kótergen sportshylar men aq halatty dárigerler, metsenattyqpen kózge túsken beldi kásipkerler men ǵalymdar, mádenıet pen qoǵamdyq salada el aýzynda júrgen azamattar Elbasynyń jyly lebizine bólendi.