Prezıdent Jarlyǵymen TÚRKSOI bas hatshysy «Dostyq» ordenimen marapattaldy
Mádenıet jáne sport mınıstrliginen málim etkendeı, Qazaqstanǵa jumys saparymen Ózbekstannyń Mádenıet mınıstri Ozodbek Nazarbekov, sondaı-aq Túrkııa, Ázerbaıjan jáne Qyrǵyzstan Mádenıet mınıstrleriniń orynbasarlary Serdar Cham, Mýrad Gýseınov pen Qaırat Imanalıev keldi.
Abaı atyndaǵy memlekettik akademııalyq opera jáne balet teatrynda saltanatty kontsert ótti. Іs-shara TÚRKSOI bas hatshysy, Qyrǵyzstannyń Halyq jazýshysy Sultan Raevty Prezıdent Qasym-Jomart Toqaevtyń jarlyǵymen II dárejeli «Dostyq» ordenimen marapattaýdan bastaldy.
Kontserttik baǵdarlama aıasynda sahnada Qazaqstan men TÚRKSOI-dyń basqa da elderiniń artısteri óner kórsetti.
Sondaı-aq túrki elderiniń ulttyq kıimderiniń taqyryptyq fotokórmesi men defılesi ótti. Al teatr aýlasynda qazaqstandyq qolónershilerdiń kórmesi uıymdastyryldy.
«Qazaqstan – TÚRKSOI-dyń belsendi qatysýshysy. Elimizdiń bastamasy boıynsha 2023 jyl uıym deńgeıinde Temirbek Júrgenov jyly bolyp jarııalandy. Uly qaıratkerdiń 125 jyldyǵyna oraı TÚRKSOI elderinde júzden astam túrli is-sharalar ótedi. Atap aıtqanda, kontsertter, ǵylymı-tájirıbelik konferentsııalar jáne kitaptardyń tusaýkeserleri osy kóktemde Almatyda bastaldy», - dedi QR Mádenıet jáne sport mınıstri Ashat Oralov.
«Qazaqstan Respýblıkasynyń Prezıdentine maǵan kórsetken qurmeti úshin alǵys aıtamyn. Qazaq jeri túrki mádenıeti úshin kóptegen mańyzdy tulǵalardyń otany boldy. Jahandanýdyń qazirgi dáýirinde týǵan mádenıetti saqtaýdyń mańyzdylyǵy burynǵydan da ózekti. Sondyqtan TÚRKSOI elderiniń barlyǵy osy ortaq mıssııa úshin birlesip jumys isteıtin bolady», — dedi Sultan Raev.
Eske salaıyq, aýqymdy mádenı baǵdarlama 7 maýsymda bastaldy. QR Ortalyq memlekettik mýzeıinde «Myńjyldyq órkenıet tarıhy» kórmesi uıymdastyryldy. Kelýshilerdiń nazaryna áıgili «Altyn adam» jáne júzden astam kóne jádiger usynyldy.
Kelesi kúni Á.Qasteev atyndaǵy QR Memlekettik óner mýzeıinde «Biz birgemiz» atty kórme ashyldy. Onda mýzeı qorynan otandyq sýretshilerdiń 40 týyndysy, sondaı-aq Túrkistannan ákelingen 30 sýret usynyldy.
Al QR Ulttyq kitaphanasynda sol kúni «Túrki áleminiń birligi» atty kitap kórmesi bastaldy. Onda kitaphana qorynan sırek kezdesetin kitaptar men qoljazbalar: Fırdoýsıdiń «Shahname» jáne «Nasabnamnyń» eńbekteri, Qoja Ahmet ıAsaýı, Baqyrǵanı, Álisher Naýaı, Sopy Allaıardyń ejelgi eńbekteri, Abaıdyń alǵashqy baspa kitaby, Ahmet Baıtursynov, Maǵjan Jumabaev, Júsipbek Aımaýytovtyń eńbekteri, sondaı-aq túrkiler tarıhy boıynsha kitap materıaldary, qujattar usynyldy TÚRKSOI týraly, HH ǵasyrdyń birinshi jartysyndaǵy merzimdi basylymdar, túrki halyqtarynyń mýzykalyq shyǵarmalary bar vınıldik gramplastınkalar kópshilikke usynyldy.
TÚRKSOI – túrki halyqtarynyń ortaq materıaldyq jáne mádenı eskertkishterin saqtaý, damytý jáne bolashaq urpaqqa jetkizý maqsatyn kózdeıtin halyqaralyq uıym. 1993 jyly Almatyda qurylǵan. TÚRKSOI quramyna 6 memleket kiredi: Qazaqstan, Túrkııa, Qyrǵyzstan, Ázerbaıjan, Túrikmenstan jáne Ózbekstan.