Prezıdent Jarlyǵy múmkindigi shekteýli adamdardyń quqyǵyn qamtamasyz etýdi keńeıtedi - sarapshy
«Jalpy, atalǵan Jarlyqqa qol qoıýdy ońtaıly baǵalap otyrmyn. Qujatqa múgedektigi bar azamattarǵa qatysty adam quqyqtary engizilgenine qýanyshtymyn. Muny múmkindigi shekteýli jandardyń quqyqtaryn qamtamasyz etýge baǵyttalǵan qazirgi portsesterdiń katalızatory bolady dep úmittenemin. Múgedektigi bar adamdardyń quqyqtary áli de buzylyp keledi, sondyqtan bizdiń quqyqtarymyz jaıynda belsendi túrde jarııalanyp otyr. Múmkindigi shekteýli belsendiler men sarapshylar Májilis, Senat, Eńbek mınıstrligi janyndaǵy jumys toptaryna shaqyrtylyp keledi. Onda bizdiń ókilder kóptegen salmaqty usynystar engizip jatqanyn kórip otyrmyz», - dedi Venıamın Alaev.
Onyń aıtýynsha, qazirgi kezde BUU-nyń Múgedektigi bar adamdardyń quqyqtary týraly konventsııasynyń normalaryna sáıkes bolýy úshin elimizdiń zańdaryna tıisti túzetýler engizý jalǵasyp jatyr. Onda múmkindigi shekteýli jandardyń quqyqtaryn jaqsartatyn túzetýler eskerilgen.
«Bul protsestiń ilgerilip, alǵa jyljyǵany mańyzdy. Eń bastysy, osy zańdar oryndalýy tıis. BUU-nyń Múgedektigi bar adamdardyń quqyqtary týraly konventsııasy 2015 jyly ratıfıkatsııalandy. Kóbisi múmkindigi shekteýli adamdardyń ómiri birden jaqsaryp ketedi dep oılady, alaıda bul ýaqytty qajet etetin protsess ekenin kórip otyrmyz», - dedi sarapshy.
«Atap aıtqanda, Jarlyq bul baǵyttaǵy protsesterdi aıaqtaýǵa qosymsha senimdilik beredi dep sanaımyn», - dedi Q.Imanalıev atyndaǵy Múgedekterdiń quqyqtary jónindegi komıssııa jetekshisi Venıamın Alaev.
Aıta keteıik, osyǵan deıin Qazaqstan Prezıdenti Qasym-Jomart Toqaevtyń QR adam quqyqtary salasyndaǵy odan ári sharalary týraly Jarlyqqa qol qoıǵany habarlandy.