Prezıdent: Jarqyraǵan záýlim ǵımarattar, baı aýdandar men naǵyz lashyqtar, jartylaı buzylǵan ǵımarattar - bul bizdiń jolymyz emes
«Kásipkerliktiń áleýetin iske qosý jáne jeke qurylys salýshylardyń ınvestıtsııalyq belsendiligin yntalandyrý qajet dep sanaımyn. Investorlar qaıta jańartý aýmaǵynda jer ýchaskelerin buzýǵa jáne satyp alýǵa qarajat jumsaǵysy kelmeıtini túsinikti. Olarǵa Astananyń sol jaǵalaýynda daıyn ınjenerlik jelileri bar bos keńistikterde salý tıimdirek. Biraq ymyra tabý kerek. Oń jaǵalaýdy – qalanyń eski bóligin kútip ustaýǵa jáne durys damytýǵa nazar aýdarý kerek, onyń ózindik harızmasy bar. Bizge Astananyń tepe-teń damýy qajet», - dedi Qasym-Jomart Toqaev.
Memleket basshysynyń aıtýynsha, ınvestorlar apatty nysandardy súrip, turǵyndaryn basqa úılerge qonystandyrýy qajet. Al bosatylǵan ýchaskelerde jańa úıler salýy kerek. Ákimdik óz tarapynan olarǵa qajetti jaǵdaı jasaýǵa tıis. Qalalyq ınjenerlik ınfraqurylymdy damytý, joldar men áleýmettik nysandar salý qajet. Osylaısha, apatty jáne tozyǵy jetken turǵyn úı máselesin jalpy kúsh-jigermen sheshýge bolady.
«Munan bólek, bul qala ortalyǵy men onyń tóńireginiń damýyndaǵy teńgerimsizdikterdi joıýǵa kómektesedi. Qalanyń eski bóliginiń syrtqy kelbeti de túrlenedi. Adamdardyń jaıly ómir súrýin qamtamasyz etetin úzdik qala qurylysy sheshimderi Astananyń barlyq aýmaǵynda paıdalanylýy tıis. Jarqyraǵan záýlim ǵımarattar, baı aýdandar men naǵyz lashyqtar, jartylaı buzylǵan ǵımarattar - bul bizdiń jolymyz emes. Jaǵdaıdy «teńestirý» kerek. Ádil qoǵam qurý ıdeıasynyń máni de osynda jatyr«, - dedi Prezıdent.