Prezıdent janyndaǵy jastar saıasaty keńesiniń jańa quramdaǵy alǵashqy jıyny ótti

ALMATY. QazAqparat - Almatyda Memlekettik hatshy Erlan Qarınniń tóraǵalyǵymen jańartylǵan quramdaǵy Qazaqstan Respýblıkasy Prezıdenti janyndaǵy Jastar saıasaty jónindegi keńestiń birinshi otyrysy ótti, dep habarlaıdy QazAqparat.

Keńestiń jańa quramyna qoǵamdyq belsendiler, jas ǵalymdar men kásipkerler, óńirler, aýyl jáne shyǵarmashyl jastardyń ókilderi, «Táýelsizdik urpaqtary» grantynyń ıegerleri, Prezıdenttik jastar kadr rezerviniń músheleri, túrli jastar uıymdarynyń kóshbasshylary kirdi.

Óz sózinde Erlan Qarın Memleket basshysy Joldaýynyń negizgi tezısterine toqtaldy.

Ol Prezıdent jarııalaǵan jańa reformalar memlekettik qurylystyń kezekti kezeńi, Jańa Qazaqstandy qurý men jańa bastamalardyń bastaýy ekenin atap ótti.

Bul reformalar azamattar, ásirese jastar tarapynan úlken qoldaýǵa ıe bolyp jatyr.

Bul turǵyda keńestiń róli artady, óıtkeni onyń músheleri zań jobalaryn, tujyrymdamalardy jáne basqa da strategııalyq qujattardy talqylaýǵa qatysady dep kózdelgen.

Qazirgi ýaqytta jastar saıasaty týraly zań jobasy Parlament Májilisinde qaralyp jatyr.

E.Qarın Keńes ókilderin Májilistiń jumys toptarynyń quramyna kirgizýdi usyndy.

Budan basqa, jastar saıasaty jónindegi keńes júıeli jumys isteýi úshin onyń janynan túrli komıtetter qurý josparlanǵan.

Budan ári otyrysta QR Premer-Mınıstriniń orynbasary Eraly Toǵjanov, QR Bilim jáne ǵylym mınıstri Ashat Aımaǵambetov, QR Eńbek jáne áleýmettik qorǵaý mınıstri Serik Shapkenov jáne «Jastar» ǵylymı-zertteý ortalyǵynyń dırektory Ázız Ysqaqov baıandama jasady.

Kezdesý suraq-jaýap formatynda jalǵasty, Keńes músheleri memlekettik organdardyń basshylaryna óz saýaldary men usynystaryn joldady.