Prezıdenttik jastar kadr rezervine irikteýdiń aqtyq kezeńi ótip jatyr

<p>Prezıdent Ákimshiliginiń Basshysy Oljas Bektenovtiń tóraǵalyǵymen 2023 jyldyń 19-23 jeltoqsany aralyǵynda Qazaqstan Respýblıkasy Prezıdenti janyndaǵy Jastar kadr rezervi jónindegi ulttyq komıssııa Prezıdenttik jastar kadr rezervine irikteýdiń aqtyq kezeńin ótkizip jatyr, dep habarlaıdy <a href="https://kaz.inform.kz/" target="_blank" rel="noopener">Kazinform </a>Aqordanyń baspasóz qyzmetine silteme jasap.&nbsp;</p>

Bıylǵy irikteýge 6404 adam nemese rezervtegi 1 orynǵa 128 úmitker qatysty. Kóp kezeńnen turatyn irikteý nátıjesi boıynsha Ulttyq komıssııa múshelerimen áńgimelesýden ótetin 100 úzdik kandıdat anyqtaldy.

Áńgimelesý qorytyndysy boıynsha Prezıdenttik jastar kadr rezervine 50 adam iriktelip alynady. Olar aldaǵy ýaqytta memlekettik organdar men ulttyq kompanııalarda túrli jaýapty laýazymdarǵa taǵaıyndalady.

Prezıdenttik jastar kadr rezervi – Memleket basshysynyń talantty jastardy memlekettik basqarý júıesine tartý jónindegi bastamasy. Rezervke irikteý tek joǵary kásibı jáne moraldyq qasıetter negizinde olardyń mansabyn ósirýge múmkindik beredi.

2019 jyldan beri memlekettik organdar men kvazımemlekettik sektordaǵy túrli laýazymdarǵa rezervtegi 270 jas maman taǵaıyndaldy. Olardyń 33-i saıası, beseýi – «A» korpýsyndaǵy ákimshilik laýazymdarda qyzmet atqarady.