Prezıdent janyndaǵy komıssııa Kárim Másimovke keshirim bermeýdi usyndy

<p>ASTANA. KAZINFORM &ndash;&nbsp; Prezıdent janyndaǵy azamattarǵa keshirim jasaý jónindegi komıssııanyń tóraǵasy Marat Báshimov Kazinform tilshisine&nbsp; Ulttyq qaýipsizdik komıtetiniń burynǵy tóraǵasy Kárim Másimovke keshirim berýden bas tartý jóninde usynym qabyldaǵandaryn rastady.</p>

Aıta ketý kerek, bul týraly Májilis depýtattary Facebook-tegi paraqshalarynda jazǵan bolatyn.

«Prezıdent janyndaǵy azamattarǵa keshirim jasaý jónindegi komıssııa Kárim Másimovke keshirim berýden bas tartty», - dep jazdy Abzal Quspan.

Dál osyndaı málimetti Májilistiń taǵy bir depýtaty Marat Báshimov Facebook-te jazdy.

«Keshirim jasaý jónindegi komıssııa ótti. Komıssııanyń sońǵy otyrysynda keshirim berý týraly keıbir materıaldar aldyn ala qaraldy. Merzimdi eki jylǵa qysqartý jolymen keıbir oń usynymdar qaraldy. Jýrnalısterdiń K.Másimovke keshirim berý týraly suraǵyna aıtarym, komıssııa onyń ótinishinen bas tartýdy usyndy», - dep jazdy zańger depýtat.

Marat Báshimov – atalǵan komıssııanyń tóraǵasy. Depýtat Kazinform tilshisine komıssııanyń usynymy túpkilikti sheshim emes ekenin aıtty.

«Konstıtýtsııanyń 44-baptyń 15-tarmaǵyn qarasańyzdar, aıtylǵan. Azamattarǵa keshirim berý týraly túpkilikti sheshimdi Prezıdent qabyldaıdy. Biz Kárim Másimovtiń keshirim berý týraly ótinishin komıssııanyń sońǵy otyrysynda ózge de birneshe máselemen birge qaradyq jáne keshirim berýden bas tartý týraly usynym qabyldadyq. Prezıdent túpkilikti sheshim qabyldaǵan kezde osy usynymdy da eskeredi», - dedi Marat Báshimov.