Prezıdent jańa Úkimetke qandaı mindetter júktedi

<p>ASTANA. KAZINFORM — Prezıdent Qasym-Jomart Toqaev Májilistiń jalpy otyrysynda jańadan jasaqtalatyn Úkimettiń aldynda turǵan mindetterdi atady. </p>

«Qurmetti depýtattar, barshańyzǵa málim, búgingi Qazaqstan — halyqaralyq qoǵamdastyqta abyroı-bedeli bar memleket. Bul — elimiz úshin zor jetistik dep senimmen aıtýǵa bolady. Shetel saıasatkerleri jáne sarapshylary Qazaqstan Ortalyq Azııada áleýmettik-ekonomıkalyq damý qarqyny jáne jalpy ekonomıkanyń kólemi boıynsha kósh bastap turǵanyn moıyndaıdy», — dedi Memleket basshysy.

Prezıdent qazir Úkimetke bosańsıtyn kez emes ekenin eske saldy.

«Biraq biz elimizdiń áleýetin odan ári arttyrýmyz kerek. Bul — aldymyzda turǵan bıik maqsat. Sondyqtan bosańsýǵa bolmaıdy. Basqa sózben aıtqanda, uzaqmerzimdi strategııalyq maqsattarǵa qol jetkizý úshin munyń bári jetkiliksiz ekeni anyq. Qazaqstandy ozyq elge aınaldyrýymyz kerek. Bul jaı uran emes. Bul — bizdiń naqty josparymyz. Bizge keregi — damýdyń sara joly. Sondyqtan túbegeıli saıası reformalar júrgizýmen qatar elimizdiń qoǵamdyq-ekonomıkalyq ómirinde eleýli ózgerister jasaý úshin batyl sharalar qabyldaýymyz kerek. Eń bastysy, bizdiń búkil is-áreketimiz Ádiletti Qazaqstan qurý qaǵıdatyna saı bolýǵa tıis», — dedi Qasym-Jomart Toqaev.

Aıta keteıik, keshe Memleket basshysy Úkimetti otstavkaǵa jiberdi.  

Prezıdent keńesshisi — baspasóz hatshysy Berik Ýálı Úkimet basshysyn taǵaıyndaý rásimin túsindirdi.  

Qazaqstan Respýblıkasy Premer-Mınıstri mindetin ýaqytsha atqarý Roman Vasılevıch Sklıarǵa júktelgen edi.