Prezıdent zeınetkerlerge 55 myń teńge tóleý týraly Jarlyqqa qol qoıdy - feık
17:08, 07 Shilde 2022
NUR-SULTAN. QazAqparat – Jelide Memleket basshysy Qasym-Jomart Toqaevtyń barlyq zeınetkerlerge 55 myń teńge tóleý týraly Jarlyqqa qol qoıǵany týraly habarlama taralyp jatyr. Bul – jalǵan, dep habarlaıdy QazAqparat stopfake.kz telegram kanalyna siltem jasap.
«Tólemder týraly mátinde osy jyldyń 1 mamyrynan bastap eń tómengi kúnkóris deńgeıi men aılyq eseptik kórsetkishtiń mólsheri óskendigi, sonyń saldarynan zeınetaqy 55 myń teńgege deıin kóteriletini jazylǵan. Bul - burmalanǵan aqparat. Aılyq eseptik kórsetkish mólsheri Qazaqstanda bıyl 1 sáýirde artty. Qasym-Jomart Toqaevtyń AEK-ti ulǵaıtý týraly jańa jarlyqqa qol qoıǵany týraly aqparat QR Prezıdentiniń resmı saıtynda joq. Sondaı-aq, bul týraly aqparat resmı BAQ-ta da jarııalanbaǵan. Zeınetkerlerge 55 myń teńge tóleý týraly jańalyqtar QR Eńbek jáne halyqty áleýmettik qorǵaý mınıstrliginiń resmı saıtynda da joq», - delingen aqparatty tekserýshiler kanalynda.