Prezıdent: Volonterlerdiń front-keńsesi barlyq óńirde ashylady

NUR-SULTAN. QazAqparat – Qazaqstan Prezıdenti Qasym-Jomart Toqaev «Birgemiz» respýblıkalyq front-keńsesiniń ortalyqtary elimizdiń barlyq óńirinde ashylatynyn málim etti, dep habarlaıdy QazAqparat tilshisi.

«Búgin bárimiz erekshe tarıhı oqıǵaǵa baılanysty elordada jınalyp otyrmyz. Bul elimizdiń tarıhynda mundaı is-shara buryn bolǵan joq. Bıyl Volonterlar jylynda kóptege aýqymdy jobalar qolǵa alynady. Osy arnaıy keńsede óte mańyzdy bastamalar júzege asady dep senemin. Mundaı ortalyqtar elimizdiń barlyq óńirinde ashylady», - dedi Memleket basshysy elordadaǵy Birgemiz» respýblıkalyq front-keńsesiniń ashylý saltanatynda.

Aıta ketsek, Prezıdent Qasym-Jomart Toqaev elordada EKSPO kórmesiniń «Art Hub» pavılonynda ornalasqan volonterlerdiń «Birgemiz» respýblıkalyq front-keńsesiniń ashylý saltanatyna qatysýda. Volonter jyly aıasynda front-keńseniń ashylýy barysynda «QQQAZVOLUNTEER.KZ« onlaın platformasynyń qyzmeti jáne volonterliktiń «Bilim», «Qamqor», «Úmit», «Sabaqtastyq», «Taza Álem» jáne «Saulyq» atty 7 salalyq baǵyt boıynsha alańdary tanystyrylady.

Front-keńse búkil Qazaqstannyń volonterleri úshin keńes berý, ádistemelik, oqytý jáne aqparattyq ortalyqqa aınalatyn bolady. Sondaı-aq, ol volonterlik jobalar men oqytý baǵdarlamalaryn úılestirý, monıtorıng jasaý, volonterlikti ilgeriletý boıynsha biryńǵaı aqparattyq saıasatty júrgizedi jáne biryńǵaı Call-ortalyqtyń jumysyn uıymdastyrady.