Prezıdent: Volonter stýdentterdiń shákirtaqysyn ulǵaıtýǵa bolady

NUR-SULTAN. QazAqparat – Volonter stýdentterdiń shákirtaqysyn ulǵaıtýǵa bolady. Bul týraly búgin Jastar jylynyń jabylý jáne Volonter jylynyń ashylý saltanatynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Volonterlerdiń shákirtaqysyn ulǵaıtýǵa bolady dep esepteımin. Úkimet bul máseleni sheshedi dep oılaımyn. Al kommertsııalyq baǵytta bilim alatyndarǵa áleýmettik stýdenttik kredıt júıesin engizý qajet. Bul keıbir akademııalyq kredıtterdi volonterlik saǵat esebinen esepke alýǵa quqyq beredi», - dedi QR Prezıdenti.

Memleket basshysy qazirgi ýaqytta qurylyp úlgergen volonterliktiń onlaın tuǵyrnamasy jumysyn jetildirý mańyzdylyǵyna da nazar aýdartty.

«Korporatıvtik volonterlikti de damytý qajet. Menińshe, iri kompanııalardyń qyzmetkerleri jumys aptasynyń aıasynda birneshe saǵatyn qoǵamǵa qaıtarymsyz kómekke arnaı alady. Memlekettik apparat pen ulttyq kompanııalar da korporatıvtik volonterlikti engizý arqyly ózderinen bastaı alady», - dedi Qasym-Jomart Toqaev.