Prezıdent Vetnam Kommýnıstik partııasy Ortalyq komıtetiniń Bas hatshysymen kezdesti
Áńgimelesý barysynda qazaq-vetnam kún tártibindegi ózekti máseleler qarastyryldy.
Memleket basshysynyń aıtýynsha, qazaq halqy vetnam halqy men eldiń jetistikterine zor qurmetpen qaraıdy. Sondaı-aq Qasym-Jomart Toqaev óz saparynyń negizgi maqsattarynyń biri barlyq saladaǵy yntymaqtastyqqa, sonyń ishinde ekonomıkalyq qatynastarǵa tyń serpin berý ekenin jetkizdi.
Prezıdent eki eldiń kópjaqty baılanystaryn nyǵaıtý úshin birlesken jumystardy belsendi júrgizýge daıyn ekenine toqtaldy. Sonymen qatar Qazaqstanda júrgizilip jatqan aýqymdy saıası jáne ekonomıkalyq ózgerister týraly aıtty.
Óz kezeginde Vetnam Kommýnıstik partııasy Ortalyq komıtetiniń Bas hatshysy Ngýen Fý Chong Qazaqstan men Vetnam arasynda berik dostyq pen ortaq qundylyqtarǵa negizdelgen tyǵyz ári úılesimdi qatynas ornaǵanyn atap ótti. Sondaı-aq Vetnam halqy jáne jeke ózi Qazaqstan men onyń halqyna árdaıym erekshe qurmetpen qaraıtynyn jetkizdi.