Prezıdent úshinshi eldermen ózara saýdaǵa qatysty zańǵa qol qoıdy

ASTANA. QazAqparat - Memleket basshysy «Úshinshi eldermen ózara saýdadaǵy tehnıkalyq kedergilerdi joıý tártibi jáne sharttary týraly kelisimdi ratıfıkatsııalaý týraly» Qazaqstan Respýblıkasynyń Zańyna qol qoıdy.

Bul týraly QazAqparat Aqordanyń resmı saıtyna silteme jasap habarlaıdy.

Osy Kelisimge qol qoıý Eýrazııalyq ekonomıkalyq odaq týraly sharttyń 55-babynda eskerilgen. Kelisim múshe memleketterdiń úshinshi eldermen ózara saýdasyndaǵy EAEO-nyń tehnıkalyq reglamentteri qoldanylatyn ónimge qatysty kedergilerdi joıý tártibi men sharttaryn aıqyndaıdy. Osyǵan deıin EAEO-nyń 52 tehnıkalyq reglamenti qabyldandy, onyń 45-i kúshine endi.

Kelisimde sondaı-aq múshe memleketterde jáne úshinshi elde qoldanylatyn sáıkestikti baǵalaý jónindegi organdardy akkredıtteý rásimderiniń balamalylyǵy qamtamasyz etilýi tıis ekendigi kózdelgen. Usynylǵan tásil otandyq ónimdi ilgeriletýge baǵyttalǵan.

Zańnyń mátini baspasózde jarııalanady.