Prezıdent úndeýi tarıhı ádilet ornatýda zor mańyzǵa ıe - ǵalym

NUR-SULTAN. QazAqparat - Tarıh ǵylymdarynyń doktory, professor Georgıı Kan Memleket basshysy Qasym-Jomart Toqaevtyń Saıası qýǵyn-súrgin jáne asharshylyq qurbandaryn eske alý kúnine oraı úndeýine pikir bildirdi, dep habarlaıdy QazAqparat tilshisi.

«Sonaý 1997 jyldyń 31 mamyrynda Qazaqstannyń Tuńǵysh Prezıdenti - Elbasy Nursultan Nazarbaevtyń Jarlyǵymen 31 mamyr Saıası qýǵyn-súrgin qurbandaryn eske alý kúni retinde belgilengen bolatyn. Sodan beri osy kún Saıası qýǵyn-súrgin qurbandaryn eske alý kúni retinde atalyp ótilýde. Al bıyl, osynaý data qarsańynda QR Prezıdenti Qasym-Jomart Toqaev Qazaqstan halqyna úndeý jarııalap otyr», - dedi ol.

Osy oraıda ǵalym bul datanyń elimiz úshin zor mańyzǵa ıe ekendigin basa aıtty.

«Shynymen de, bul datanyń úlken mańyzy bar ekendigin atap ótemiz. Memleket basshysy úndeýinde sol bir qasiretke toly jyldardyń ishinde qazaqstandyq árbir otbasynyń basyna tóngen óte aýyr faktini keltiredi. Saıası qýǵyn-súrgin saldarynan 100 myń adam zardap shekti jáne olardyń 20 myńnan astamy atylyp ketti. Ujymdastyrý jyldarynda 3 mıllıonǵa jýyq qazaqstandyq ashtyqtan qyryldy. Biz saıası qýǵyn-súrgin qurbandaryn esten shyǵarmaýǵa tıispiz. Olardy esh ýaqytta jadymyzdan da shyǵarmaýymyz qajet. Osy oraıda Memleket basshysynyń úndeýindegi memlekettik komıssııa qurý týraly tapsyrmasynyń asa mańyzdy ekendigin atap ótkim keledi. Bul tarıhı ádildikti ornatý, saıası qýǵyn-súrgin qurbandaryn aqtaý jolyndaǵy jumystardyń aıaqtalýyna sep bolady», - dedi Georgıı Kan.