Prezıdent Ulttyq qaýipsizdik komıtetine jańa mindetter júktemek

ASTANA. QazAqparat – Ulttyq qaýipsizdik komıtetine qosymsha quzyretter berýdi kózdeıtin Prezıdent Jarlyǵynyń-jobasy ashyq talqyǵa shyǵaryldy, dep habarlaıdy QazAqparat tilshisi.

Ashyq NQA portalynda jarııalanǵan qujatta jazylǵandaı, atalǵan vedomstvoǵa myna fýnktsııalar berilmek:

- ulttyq qaýipsizdik organdarynyń qyzmetkerleri men áskerı qyzmetshilerin, sondaı-aq azamattyq kontıngentin memlekettik nagradalarymen nagradtaý týraly usynys jasaý qaǵıdalaryn ázirleý jáne bekitý;

- Ulttyq qaýipsizdik komıteti áskerı polıtsııasy organdarynyń profılaktıkalyq esepke alýdy júrgizý jáne profılaktıkalyq baqylaýdy júzege asyrý qaǵıdalaryn ázirleý jáne bekitý;

- tehnıkalyq barlaýǵa qarsy is-qımyl qaǵıdalaryn ázirleý jáne bekitý;

- aqparatty jáne tehnıkalyq quraldardy qorǵaý tıimdiliginiń normalaryn jáne olardyń qorǵalýyn baǵalaý ádistemesin ázirleý jáne bekitý;

- bólingen bıýdjet sheginde Ulttyq qaýipsizdik komıtetiniń Aqparatty tehnıkalyq qorǵaý jáne memlekettik qupııalardy qorǵaý salasynda mamandar daıarlaý ortalyǵynda mamandardy daıarlaý, qaıta daıarlaý jáne biliktiligin arttyrý kýrstary boıynsha oqytýshylardyń qyzmetin tóleý úshin 1 akademııalyq saǵatynyń qunyn belgileý;

- ulttyq qaýipsizdik organdarynyń qarsy barlaý, barlaý, jedel-izdestirý qyzmetin jáne tergeý áreketterin psıhologııalyq súıemeldeýdi uıymdastyrý jáne júzege asyrý qaǵıdalaryn ázirleý jáne bekitý;

- ulttyq qaýipsizdik organdarynda áskerı qyzmetshilerdiń Qazaqstan Respýblıkasynyń sybaılas jemqorlyqqa qarsy is-qımyl týraly zańnamasynyń talaptaryn saqtaýyna tekserýlerdi júzege asyrý qaǵıdalaryn ázirleý jáne bekitý;

Jarlyq-jobasy 19 qyrkúıekke deıin kópshilik talqylaýda bolady.