Prezıdent ulttyq qaýipsizdik organdary qyzmetiniń baǵyty boıynsha birqatar tapsyrma berdi

<p>ASTANA. KAZINFORM &mdash; Memleket basshysy Ulttyq qaýipsizdik komıtetiniń tóraǵasy Ermek Saǵymbaevty qabyldady. Bul týraly <a href="https://akorda.kz/kz/memleket-basshysy-ulttyk-kauipsizdik-komitetinin-toragasy-ermek-sagymbaevty-kabyldady-511394" target="_blank" rel="noopener">Aqordanyń</a> baspasóz qyzmeti málim etti.&nbsp;</p>

Qasym-Jomart Toqaevqa vedomstvonyń jyl basynan beri atqarǵan jumysynyń negizgi qorytyndylary jáne aldaǵy kezeńge arnalǵan mindetteri týraly esep berildi.

Ermek Saǵymbaev ulttyq qaýipsizdik organdary 4 terrorıstik aktiniń aldyn alǵanyn habarlady. UQK málimetinshe, terrorızm men ekstremızmge qatysy bar 84 adam sottalǵan, 44 adam ustalǵan.

Lańkestik sıpattaǵy qylmys jasady degen kúdikpen izdeýde júrgen qazaqstandyq 6 azamat Sırııa men Túrkııadan ekstradıtsııalandy, olardyń ekeýi sottaldy. Terrorızm men ekstremızmge qatysy bar 824 sheteldiktiń Qazaqstanǵa kirýine jol berilmedi.

Budan bólek, Qasym-Jomart Toqaevqa Іshki ister mınıstrligimen birge 19 uıymdasqan qylmystyq toptyń áshkerelengeni, 60 adamnyń qamaýǵa alynǵany baıandaldy. Zańsyz aınalymdaǵy 505 atys qarýy, 5 qoldan jasalǵan jarylǵysh qurylǵy, 45 jarylǵysh toptama jáne 15 046 oq-dári tárkilendi.

Esirtki óndiretin 33 zerthana, ony tasymaldaıtyn 35 halyqaralyq jáne 31 óńirlik arna joıyldy. Sondaı-aq 3,2 tonna esirtki quraldary jáne psıhotroptyq zattar, 4,5 tonna kóknár shıkizaty, 18,8 tonna prekýrsorlar tárkilendi. Esirtki quraldary men psıhotroptyq zattardyń zańsyz aınalymyna qatysy bar 162 adam sottaldy.

UQK tóraǵasynyń aıtýynsha, ekonomıkalyq qaýipsizdikti qamtamasyz etý jáne sybaılas jemqorlyqqa qarsy is-qımyl aıasynda 1,6 trıllıon teńgeden astam kólemde memleketke keltiriletin zalalǵa tosqaýyl qoıyldy, bıýdjetke 315 mıllıard teńge óteldi. Sybaılas jemqorlyq áreket jasaǵany úshin 46 adam sottaldy.

Memlekettik shekarada 55 myńǵa jýyq quqyq buzýshy ustaldy, qarý men oq-dárini, esirtki men basqa da tyıym salynǵan zattardy tasymaldaýdyń 1300-den asa áreketiniń joly kesildi. Shekara arqyly 18 mıllıard teńge kóleminde valıýta men quny 66 mıllıard teńge bolatyn taýarlardy zańsyz ótkizýge jol berilmedi. Zańsyz kóshi-qonnyń 20 arnasy toqtatyldy.

Komıtet memlekettik organdardyń aqparattyq júıelerine 552 mıllıonnan astam kıbershabýyldy jáne 6 myń DDoS-shabýyldy toıtardy.

Prezıdent kezdesý sońynda ulttyq qaýipsizdik organdary qyzmetiniń baǵyttary boıynsha birqatar tapsyrma berdi.

Eske salsaq, búgin Prezıdent Qasym-Jomart Toqaev Eýrazııalyq ekonomıkalyq komıssııa alqasynyń tóraǵasy Baqytjan Saǵyntaevty qabyldady. Qabyldaýda Qasym-Jomart Toqaevqa 26 jeltoqsan kúni Sankt-Peterbýrg qalasynda ótetin Joǵary Eýrazııalyq ekonomıkalyq keńestiń kezekti otyrysyna ázirlik barysy týraly aqparat berildi.