Prezıdent Úkimet múshelerimen elimizdiń ekonomıkalyq jaǵdaıyn talqylady

<p>ASTANA. KAZINFORM - Aqordada Memleket basshysy Qasym-Jomart Toqaevtyń tóraǵalyǵymen elimizdiń áleýmettik-ekonomıkalyq damý máseleleri jáne Úkimettiń ortamerzimdi kezeńge arnalǵan boljamdary qarastyrylǵan keńes ótti.</p>

Jıynǵa Premer-Mınıstr Oljas Bektenov, Prezıdent Ákimshiliginiń Basshysy Aıbek Dádebaı, Ulttyq bank tóraǵasy, Joǵary aýdıtorlyq palatanyń tóraǵasy, Úkimet músheleri jáne basqa da laýazymdy tulǵalar qatysty.

Prezıdentke negizgi áleýmettik-ekonomıkalyq damý kórsetkishteri, respýblıkalyq bıýdjettiń bıylǵy 7 aıdaǵy oryndalýy jáne 2025-2027 jyldarǵa arnalǵan respýblıkalyq bıýdjet jobasyndaǵy makroekonomıkalyq parametrler jóninde baıandaldy.

Úkimet kelesi jyly ekonomıka 5,6 paıyz deńgeıinde ósim kórsetedi, al ınflıatsııa 5,5-7,5 paıyzǵa deıin tómendeıdi dep boljam jasap otyr.

Memleket basshysy Úkimetke makroekonomıkalyq kórsetkishterdi boljaý jáne memlekettik bıýdjet sapasyn arttyrý, ortalyqtaǵy jáne jergilikti deńgeıdegi memlekettik shyǵyndardy basymdyǵyna qaraı retteýdiń naqty mehanızmin engizý, sondaı-aq kóleńkeli ekonomıkamen kúres sharalaryn kúsheıtý týraly mindet júktedi.