Prezıdent Úkimettiń jańa quramynyń aldynda turǵan basty mindetterdiń birin atady

NUR-SULTAN. QazAqparat – Básekege qabiletti sektorlardy anyqtaý kerek. Búgin Parlament Májilisiniń jalpy otyrysynda Memleket basshysy Qasym-Jomart Toqaev osylaı málim etti, dep habarlaıdy QazAqparat tilshisi.

Prezıdent Úkimet búkil ónerkásip salasyna tereń taldaý jumysyn júrgizýi tıis ekenin tapsyrdy.

«Shıkizat qoryn, quzyretteri men ekonomıkalyq tıimdilikti eskere otyryp, básekege qabiletti sektorlardy anyqtaý kerek. Júrgizilgen taldaýdyń negizinde, naqty jobalardy ázirlep, ınvestorlardy tartý qajet. Bul Úkimettiń jańa quramynyń aldynda turǵan basty mindetterdiń biri», - dedi Memleket basshysy.

Budan buryn habarlanǵandaı, Prezıdent «Samuryq-Qazyna» qory men ondaǵy sheteldik mamandardy synady.

«Ekonomıkalyq ósim memlekettiń ekonomıkadaǵy úlesin azaıtýmen tyǵyz baılanysty. Biraq jekeshelendirý júıeli jáne ashyq júrgizilip jatqan joq. Atap aıtqanda, básekelestik ortaǵa berilýi tıis aktıvterdi irikteý tásilderi aıqyndalmaǵan. Ony shuǵyl ázirleý qajet», - dedi Memleket basshysy .