Prezıdent Úkimetke tıimsiz ulttyq kompanııalardyń problemasyn sheshýdi tapsyrdy

NUR-SULTAN. QazAqparat – Nege shyǵynmen jumys istep jatqan jekelegen ulttyq kompanııalar men memlekettik kásiporyndardyń birinshi basshylary jaýapkershilik arqalamaıdy? Memleket basshysy Qazaqstan halqyna Joldaýyn jarııalap turyp, Úkimetke osyndaı saýal qoıdy, dep habarlaıdy QazAqparat tilshisi.

«Memlekettiń ekonomıkaǵa shekten tys kıligýi onyń ósimi men básekege qabilettiligin aıtarlyqtaı tejep, korrýptsııa men zańdy lobbıge jol ashyp otyr. Memlekettik kásiporyndar áli de bolsa kóptegen salalarda ústemdik etip, monopolııalyq jeńildikterdi paıdalanyp júr. Biz bul problemalardy sheshe bastadyq. Memlekettik basqarý tujyrymdamasynda kvazımemlekettik sektordy qysqartý, onyń tıimdiligi men ashyqtyǵyn, eseptiligin arttyrý jónindegi sharalar qarastyrylǵan», - degen Prezıdent Reformalar jónindegi joǵary keńestiń jekeshelendirýdiń jańa josparyn maquldaǵanyn atady.

«Endi osyǵan qatań baqylaý kerek. Biraq basqa da máseleler bar. Mysaly, nege jekelegen ulttyq kompanııalar men memlekettik kásiporyndar shyǵynmen jumys istep jatyr? Al onyń birinshi basshylary bul úshin jaýapkershilik arqalamaıdy. Úkimetke bul problemany sheshý kerek», - dedi Memleket basshysy.

Sondaı-aq, Prezıdent artyq aqsha massasyn retteý joldaryn atady.

«Jalpy kólemi 6,3 trln teńgeni quraǵan daǵdarysqa qarsy sharalardyń nátıjesinde ekonomıkada shekten tys aqsha massasy qalyptasty. Biraq osy qarjy jetpeı jatqan salalar bar. Ekinshi deńgeıli bankter shaǵyn sharalarǵa, ásirese, aýyldarda aqsha salmaıdy. Sondyqtan mıkroqarjylyq uıymdardyń áleýetin iske qosý qajet. Olar jergilikti oryndarda jumys istep júrgendikten, ondaǵy klıentterdi, olardyń bıznesin, múmkindikterin jaqsy biledi. Ulttyq bank pen Qarjy naryǵyn retteý jáne damytý agenttigi osy másele boıynsha sheshimder paketin daıyndaýy tıis», - dedi Prezıdent.