Prezıdent Úkimetke sýbsıdııa salasyna arnalǵan tegin platforma jasaýdy tapsyrdy
«Sońǵy bes jylda aýyl sharýashylyǵyn damytýǵa 2 trln teńgeden astam qarjy bólindi. Alaıda sýbsıdııa kólemi qansha ósse de, bul salada aýyz toltyryp aıtatyn ózgeris bolǵan joq. Aýyl sharýashylyǵy mınıstrligi men ákimdikter sbýsıdııany taratyp berýmen ǵana shektelgen. Oǵan eshqandaı taldaý jasalǵan joq. Qarjynyń tıimdi maqsatqa jumsalýyn da eshkim baqylaýǵa almaǵan. Sýbsıdııa túpki ıesine jetpeı, orta jolda talan-tarajǵa túsýde. Tipti aýyl sharýashylyǵyna esh qatysy joq salalar da onyń qyzyǵyn kórýde.
Sońǵy jyldary Sybaılas jemqorlyqqa qarsy is-qımyl agenttigi 960 qylmystyq isti tergegen. Sonyń 54 paıyzy sýbsıdııany jymqyrýǵa qatysty bolǵan», - dedi Memleket basshysy.
Aıtýynsha, jaıylym jerlerdi sýlandyrýǵa 80 mlrd teńge bólingenimen, onyń teń jartysy jelge ushqan.
«Osy jumysqa qajetti qural-jabdyqtyń baǵasy 2-3 ese artyq kórsetilgen. Tipti keı jaǵdaıda qarjyny qaǵaz júzinde ıgere salǵan. Sonymen qatar, sýbsıdııa alyp otyrǵan jurttyń aýyl sharýashylyǵy ónimderin óńdeýge jáne saqtaýǵa asa qulqy joq. Sebebi sýbsıdııalaý júıesiniń ózi sharýalardy buǵan yntalandyrmaıdy. Jaǵdaı túzelmese, agroónerkásip kesheni shıkizat óndirýden asa almaıtyny anyq.
Sýbsıdııalaýdyń biryńǵaı aqparattyq júıesi joq. Jeke qurylymdar sýbsıdııa bólýge qatysty túrli portaldar ashqan. Olar óz qyzmeti úshin sharýalardan 3,11 aılyq eseptik kórsetkish mólsherinde aqsha alyp otyr. Sharýalardyń buǵan narazylyq bildirýi oryndy. Úkimetke sýbsıdııalaý týraly aqparatty tolyq qamtıtyn platforma ázirleýdi tapsyramyn. Bul platforma sharýalarǵa tegin qyzmet kórsetýi kerek», - dedi Qasym-Jomart Toqaev.