Prezıdent Úkimetke munaı kompanııalaryna shetelge jol ashý úshin keshendi sharalar qabyldaýdy tapsyrdy

ASTANA. QazAqparat - Halyqaralyq munaı-gaz jobalary aıasynda otandyq kompanııalardy qoldaý jáne ilgeriletý áleýmettik máseleni sheship qana qoımaıdy, sondaı-aq valıýtalyq túsimdi aıtarlyqtaı arttyrady. Mundaı tásil álemde keń taraǵan. Bul - Prezıdenttiń pikiri, dep habarlaıdy QazAqparat.

Qasym-Jomart Toqaev bıznes ókilderimen kezdesýde Úkimetke otandyq munaı servısi kompanııalaryna shetelge jol ashý úshin keshendi sharalar qabyldaýdy tapsyrdy.

«Bul máseleni sheshýmen óz deńgeıinde aınalysyp júrgen salalyq bıznes pen qaýymdastyqtyń áleýetin barynsha jumyldyrý kerek.

Búginde sheteldik kompanııalar otandyq taýar eksporttaýshylardy dástúrli ótkizý naryqtarynan yǵystyryp jatqany baıqalady.

Mysaly, bul Iranǵa jetkiziletin Qazaqstan astyǵyna qatysty aıtylyp otyr. Osyndaı qaýip Aýǵanstan men Ortalyq Azııa baǵytynda da bar», - dedi sodan soń Prezıdent.

Memleket basshysy Qazaqstanmen kórshiles elderdiń ulttyq valıýtasynyń jaǵdaıy elimiz úshin mańyzdy taýar túrleri baǵasynyń qubylý yqtımaldyǵyn kúsheıte túskenin jetkizdi.

«Úkimette ulttyq ekonomıka úshin mańyzdy sanalatyn astyq jáne basqa da taýarlar boıynsha ishki naryqty turaqtandyrýdyń naqty ári ashyq algorıtmi bolý kerek.Belgilengen baǵa boıynsha aýyl sharýashylyǵy shıkizatyn satyp alýǵa, janar-jaǵarmaı ımportyna tyıym salýǵa, taýar basqynshylyǵyna, eksportqa nemese kvotaǵa tyıym engizýge qatysty qandaı jaǵdaı bolsyn, bıznes memlekettiń baǵany turaqtandyrý tetikteriniń qandaı túrin qoldanatynyn anyq túsinýge tıis.Salalardyń basymdyǵyna, jobanyń mańyzdylyǵyna jáne onyń ekonomıkaǵa áserine qaramastan, orta merzimdi prespektıvada kásiporyndardy qoldaýdyń naryqtyq emes mehanızmderinen, ásirese, jappaı sýbsıdııalaýdan kezeń-kezeńmen bas tartý kerek», - dedi Toqaev.

Sonymen qatar ol kepildik berý mehanızmine jáne qarjylaı qoldaýdan tys sharalarǵa kóshken jón dep sanaıdy. Memlekettik retteý men shekteýlerdiń ornyn suranys pen usynystardy «ońtaıly basqarý» almastyrýǵa tıis.

«Osy rette Azyq-túlik korporatsııasynyń áleýetin tolyq paıdalaný qajet. Men bul týraly Joldaýymda aıttym», - dedi Prezıdent.