Prezıdent UB basshysyn synǵa aldy: Quryp bara jatqan kompanııalarǵa nesıe nege berilgen
QR Prezıdenti Nursultan Nazarbaevtyń tóraǵalyǵymen ótip jatqan Úkimettiń keńeıtilgen otyrysynda Ulttyq bank tóraǵasy baıandama jasap, nesıe berý aýqymyn keńeıtý jumystary týraly aıtyp berdi.
«Sizdiń Joldaýyńyzdaǵy belgilengen tapsyrmalar aıasynda ekonomıkanyń basym baǵyttaryn qoldaý úshin 600 mlrd teńge nesıe berý mehanızmi iske qosyldy. Jobalardy qarjylandyrý mehanızmderi bekitilip, alǵashqy bank nesıe berýdi bastap ketti. Alaıda 600 mlrd teńgelik bul baǵdarlamadan bólek, Ulttyq bank aqshalaı nesıe berý saıasatynyń tıimdiligin arttyrý jumysyn kúsheıtedi. Sizdiń tapsyrmańyz boıynsha, Ulttyq bank atalmysh sektordy álsiz ári tıimdiligi tómen bankterden tazartý jumysyn júrgizdi. Buryn aıtqanymyzdaı, biz ótken jyldardyń qatelikterin eskere otyryp, zańnamalyq turǵyda jumystyń qatal erejesin engizdik», - dedi Danııar Aqyshev.
Ulttyq bank tóraǵasynyń sózin tyńdaǵan Memleket basshysy bıznesti damytýǵa baǵyttalǵan 600 mlrd teńge uzaqmerzimdi jobalarǵa jumsalýy kerektigin tilge tıek etti.
«Naqty osy qarajatty qandaı nysandarǵa jumsaıtynymyzdy aıqyndadyńyzdar ma?», - dep surady Prezıdent.
Memleket basshysynyń bul suraǵyna Premer-mınıstrdiń orynbasary Erbolat Dosaev jaýap berdi.
«Biz «Atameken» UKP jáne negizgi memlekettik organdarmen birge taýarly pozıtsııalardy da aıqyndadyq. Soma belgilendi. Qatysýshylar daıyn. Aqpan aıynan bastap belsendi túrde nesıe berýge daıynbyz», - dedi Erbolat Dosaev.
Dosaevtyń jaýabyn tyńdaǵan Memleket basshysy naqty jumys atqarý kerektigin eskertti.
«Eger kezinde nesıe alǵan álsiz kompanııalarǵa beretin bolsańyzdar, aqsha joq bolyp ketedi de, bankter qolaısyz jaǵdaıda qalady. Tek óz jumysyn kórsete bilgen kompanııalarǵa ǵana berý kerek. Biz ol týraly áli sóılesemiz», - dedi Nursultan Nazarbaev.
Danııar Aqyshev Prezıdenttiń eskertpesin tyńdaı kele óz baıandamasynda sońǵy 10 jylda bankterdiń nesıeleri 5,5 trln teńgege óskenin, bul kórsetkish 70 paıyzdyq ósim kórsetkenin atap ótti.
«Osy ýaqyt ishinde 7 bank joıylyp, 2 banktiń jumysy qaıta jandanǵandyqtan, 5 mrln teńge syzylyp qalǵan. ıAǵnı, qaryz alýshylar osy jyldar ishinde bergen aqshanyń bárin qaıtarmaǵan. Nesıeler ýaqyt óte kele problemaly sıpat alyp, bankterdiń sharttardy ózgertýge tyrysqanyna qaramastan, másele sol kúıinde qalǵan», - dedi Aqyshev.
Buǵan qatysty Prezıdent Danııar Aqyshevqa kemshilik ózinen ekenin qadap aıtty.
«Siz ózińiz durys basqarmaı, baqylamaǵansyz. Qurdymǵa ketip bara jatqan kompanııalarǵa nesıe berý kerek pe edi? Olar alǵan aqsha qumǵa sińip ketti. Barlyq ekinshi deńgeıli bankter men Úkimet bul máseleni tıisti deńgeıde baqylamaǵan. Kimge bolsa, soǵan bergen. Ol kompanııa qaıtadan nesıe alyp, tóleı almasa, taǵy suraǵan. Álemde kim olaı jumys isteıdi?», - dedi Nursultan Nazarbaev.
Óz kezeginde Danııar Aqyshev bul máseleni sheshýdiń tetikterin aıtyp, kezindegi kemshilikter boıynsha jumys túzeletinin jetkizdi.
«Endi ne isteımiz? Olarǵa ary qaraı nesıe bere beremiz be álde tártip ornatamyz ba? Olar múlde qaýqarsyz kompanııalar. Olar ary qaraı da osylaı emin-erkin júre bere me? Qylmystyq is qozǵalyp, qaıtarym barlyq múmkindikter boıynsha júrgizilýi kerek. Men jeke qadaǵalaý komıteti týraly aıtqanymda «Ózim sheshemin» degen ediń (Aqyshevqa - avt.). Zań bar, endi baqylaýǵa al. Árbir aktsıoner óz bankin tonaıdy da, keıin artynan qýyp júremiz. Sizder qaıda boldyńyzdar? Bul jumysyńyzǵa kóńil tolmaıdy», - dep túıdi sózin Nursultan Nazarbaev.
Eske sala ketsek, Úkimet úıinde QR Prezıdenti Nursultan Nazarbaevtyń tóraǵalyǵymen Úkimettiń keńeıtilgen quramdaǵy otyrysy ótip jatyr. Elbasynyń qatysýymen Úkimettiń mundaı otyrysy jyl basynda turaqty túrde ótkiziledi. Búgingi jıynǵa Úkimet músheleri, Astana, Almaty jáne Shymkent qalalary men oblystardyń ákimderi, ortalyq memlekettik organdar men mınıstrlikter basshylary qatysýda.