Prezıdent týraly konstıtýtsııalyq zańda Nazarbaevqa kepildik beretin normalar bar – vıtse-mınıstr

NUR-SULTAN. QazAqparat – QR Ádilet vıtse-mınıstri Alma Muqanova Elbasy týraly konstıtýtsııalyq zań kúshin joısa da, Prezıdent týraly konstýtsııalyq zań Elbasyǵa tiıisti kepildikter beretinin aıtty, dep habarlaıdy QazAqparat tilshisi.

«Zań shyǵarýshylar burynǵy Prezıdentterdi jaýapkershilikten qorǵaıtyn normany alyp tastaý týraly sheshim shyǵarsa, Nursultan Nazarbaevty jaýapqa tartýǵa bolatynyn aıtypsyz. Bul qashan iske asady» - dep surady BAQ ókilderi ortalyq kommýnıkatsııalar qyzmetinde ótken brıfıngide.

«Keshe Májilistiń keńeıtilgen otyrysynan keıin BAQ ókili maǵan osyǵan uqsas suraq qoıǵan bolatyn. Men oǵan Elbasy týraly zańdy joıý týraly usynys bizdiń tujyrymdamamyzda bar ekenin túsindirdim. Eger túzetýler qabyldansa, tıispeýshilik týraly bap Elbasy otbasynyń múshelerine qarastyrylmaıtyn bolady. Biraq bizde Prezıdent týraly konstıtýtsııalyq zań jobasy bar ekenin eskerýimiz kerek. Onda búkil eks-prezıdentterge qatysty normalar bar. Al Elbasy týraly bólek jazylmaǵan. Onda jalpy Prezıdentterge ókilettikterin aıaqtaǵannan keıin kepildikter beriletini týraly aıtylǵan», - dedi vıtse-mınıstr.

Onyń aıtýynsha, Prezıdent degenimiz – saıası tulǵa.

«Ol búkil memleketke qatysty ishki jáne syrtqy saıasatpen baılanysty túbegeıli sheshimder qabyldaıdy. Sondyqtan búkil eks-prezıdentterdi qamtıtyn norma tıisti konstıtýtsııalyq zańda bar. Elbasy týraly zań jobasy joıylsa da, bizde Prezıdent týraly konstıtýtsııalyq zań jobasynda tıisti kepildikterdi qamtıtyn normalar bar», - dedi Alma Muqanova.

Aıta keteıik, 7 maýsymda Ortalyq referendým komıssııasy Konstıtýtsııaǵa usynylǵan ózgerister qabyldanǵanyn málimdegen edi.