Prezıdent TRK men MNU Halyqaralyq jýrnalıstıka mektebin ashty
Іs-sharaǵa Prezıdent keńesshisi — baspasóz hatshysy Berik Ýálı, Prezıdent Teleradıokesheniniń bas dırektory Raýshan Qajybaeva, sondaı-aq birqatar shet memlekettiń elshisi qatysty.
Biregeı bilim berý jobasy elimizdiń buqaralyq aqparat quraldary úshin shyǵarmashylyq jáne tehnıkalyq mamandar daıyndaý maqsatynda Prezıdent Teleradıokeshenimen birge júzege asyrylyp otyr. Halyqaralyq mektepke birinshi oqý jylynda 201 stýdent qabyldanǵan. Olardyń 20-sy Prezıdent Teleradıokesheni men «Dara» prezıdenttik bastamalar qorynyń grantyn aldy.
Oqý aǵylshyn tilinde ótedi, jekelegen pánderde qazaq jáne orys tilderi qoldanylady.
Prezıdent baspasóz hatshysy Berik Ýálı mundaı joba halyqaralyq deńgeıdegi naǵyz kásibı mamandardy tárbıelep shyǵarýǵa múmkindik beretindigin atap ótti.
«Qazirgi myna ashylyp otyrǵan Halyqaralyq jýrnalıstıka mektebi — stýdentterge osy salada úlken múmkindikter ashatynyna senimdimin. Óıtkeni 70 paıyzy aǵylshyn, 30 paıyzy qazaq-orys tilderinde oqytylady eken. Jalpy bul halyqaralyq deńgeıde bilim alyp, kókjıek keńeıtetin myqty joba. Osyndaı aýqymdaǵy, jýrnalıstıka fakýltet Qazaqstanda tuńǵysh ret ashylyp jatyr. Osy jerden shyqqan mamandar keıingi býynǵa úlken bir mektep qalyptastyratynyna senimdimin», — dedi Berik Ýálı.
Bolashaq jýrnalısterge arnalǵan bilim baǵdarlamasy Columbia University, Berkeley University, Princeton University, City University of London syndy bilim ordalarynda qoldanylatyn úzdik álemdik tájirıbe negizinde ázirlengen.
«Búkil álem bastan keshirip otyrǵan qarqyndy ózgerister kásibı jýrnalıstıkaǵa barynsha qatań talap qoıyp otyr. Aqparattyń óte úlken kólemin óńdep, saraptaı alý, súzgiden ótkizip, synı oı eleginen ótkize bilý qajet. Sonymen qatar qazirgi BAQ mýltımedıalyqqa aınaldy. Jáne de biz jańa býyn jýrnalısterine, bolashaq áriptesterimizge túrli formatta jumys isteý úshin ózekti bilim men daǵy alýǵa múmkindik berýimiz kerek», — dedi Prezıdent Teleradıokesheniniń dırektory Raýshan Qajybaeva.
Stýdentter Prezıdent Teleradıokesheniniń myna resýrstarynda is júzinde tájirıbeden ótýge múmkindik alady: «Jibek Joly» telearnasy, «QazAqparat» HAA jáne Derekti kıno ortalyǵy. Munan bólek, stýdentterge Columbia University, University of Cambridge, New York Film Academy, Mississippi Valley State University jáne Michigan State University USA túlekteri bilim beredi.
«Jýrnalıstik bilim bir ornynda turmaıdy. Búginde biz bilim berý protsesin qarqyndy damytyp, zamanaýı bilim tehnologııasyn engizgimiz keledi. Ol — stýdentterimizdi tolǵandyratyn taqyryptar boıynsha sarapshylardyń sheberlik sabaqtary, mýltımedııalyq praktıkým, dóńgelek ústelder, baspasóz máslıhattary», — dedi Maqsut Narikbayev University basqarmasynyń tóraǵasy Talǵat Nárikbaev.