Prezıdent til reformasy týraly: Másele latyn grafıkasyna jedel túrde kóshý emes
«Bizdiń halqymyz talaı «tar jol, taıǵaq keshýdi», qıly zamandy basynan ótkergen. Qıyndyqtyń bárin jeńgen. Keshegi qasiretti oqıǵa kezinde halqymyz birligin kórsetti. Osy qundylyqty keleshek urpaqqa amanat etýimiz kerek.
Qazaqstannyń bolashaǵy jarqyn bolatyny sózsiz. Men buǵan kámil senemin. Bizdiń bir ǵana Otanymyz bar. Basqa Otanymyz joq. Bolmaıdy da. Elimizdiń Táýelsizdigi bárinen qymbat. Bul – aksıoma, aqıqat. Ony kózdiń qarashyǵyndaı saqtaý – ortaq paryzymyz», - dedi Prezıdent.
Sondaı-aq, ol egemendiktiń bir belgisi álemdik úrdiske beıimdele bilgen birtutas halyqqa aınalý ekenin jetkizdi.
«Al, Egemen el degenimiz qandaı el? Bul – álemdik úderiske beıimdelgen birtutas halyq. Derbestigin jalań sózben, nemese uranmen emes, naqty ispen dáleldeı bilgen el. Demek, «Egemendikti saqtap qalamyz ba?» degen kúmándi oı eshkimde bolmaýy kerek. Ol qısynsyz tujyrym, qısynsyz sóz. Kerisinshe, árqaısymyz «Táýelsizdigimizdi qalaı bekem ustap qalamyz?» dep oılanýǵa tıispiz», - dedi dedi Qasym-Jomart Toqaev.
Onyń aıtýynsha, egemendik nyǵaıtý jolynda til reformasyn jasaý kerek.
«Tilimizge kelsek, ony da saqtap qalamyz. Basqasha bolmaıdy, sebebi, tarıhymyzdaǵy eń kúrdeli kezeńderde tilimiz kózi ashyq aǵalarymyzdyń, qarapaıym halqymyzdyń arqasynda aman qaldy. Degenmen til reformasyn jasaýymyz kerek. Másele latyn grafıkasyna jedel túrde kóshý emes. Bul máselege baıyppen qaraǵan jón. Saraptama jasalýǵa tıis. Qısynsyz nárseniń paıdasy joq. Ásirese tilge kelgende, asyǵystyq tanytýǵa bolmaıdy. Sebebi bul óte názik dúnıe», - dedi Prezıdent.