Prezıdent TikTok kompanııasynyń bas dırektory Chjoý Shoýtszymen birqatar máseleni talqylady

<p>Memleket basshysy TikTok kompanııasynyń bas dırektory Chjoý Shoýtszymen kezdesti, dep habarlaıdy<strong> </strong><a href="https://kaz.inform.kz/" target="_blank" rel="noopener">Kazinform</a> Aqordanyń baspasóz qyzmetine silteme jasap.&nbsp;</p>

Prezıdent elimizde TikTok platformasynyń tanymaldylyǵy artyp kele jatqanyn atap ótti. Qazir oǵan 10 mıllıonnan astam qazaqstandyq tirkelgen. Beınekontent jasaýǵa jáne qaraýǵa arnalǵan álemge tanymal servıs alǵashqylardyń biri bolyp qosymsha ınterfeısin qazaq tiline aýdardy. Sondaı-aq kıberbýllıngtiń aldyn alý máseleleri boıynsha ýákilin taǵaıyndady.

Óz kezeginde Chjoý Shoýtszy Astana Hub halyqaralyq tehnoparkimen birlesip, TikTok StartUp Academy jobasyn – qazaqstandyq startaptarǵa arnalǵan eksklıýzıvti bilim berý baǵdarlamasyn júzege asyryp jatqany týraly baıandady. Budan bólek, seriktestik aıasynda TikTok Startup Valley baıqaýy ótkizildi. Nátıjesinde 200-den astam startap óz ónimderin TikTok arqyly jarnamalaý ádisterin úıretý kýrsynan ótti. 

Foto: Aqordanyń baspasóz qyzmeti

 

Kezdesý barysynda kreatıvti ındýstrııa salasyndaǵy yntymaqtastyq, jasandy ıntellekt boıynsha zertteý júrgizý, elektrondy saýdany damytý, sondaı-aq TikTok platformasy arqyly Qazaqstannyń mádenıeti men týrıstik múmkindikterin jahandyq deńgeıde nasıhattaý máseleleri qarastyryldy.